കോഴിക്കോട്: എൽഡിഎഫ് കൺവീനർ ഇ പി ജയരാജനെതിരെ ഉയർന്നുവന്ന അനധികൃത സ്വത്ത് സമ്പാദന വിഷയത്തിൽ ജുഡീഷ്യൽ അന്വേഷണം വേണമെന്ന് കെ മുരളീധരൻ എംപി. ഈ വിഷയം ഉൾപാർട്ടി പ്രശ്‌നം മാത്രമായി കാണാനാവില്ലെന്നും പാർട്ടിയല്ല ഇത് അന്വേഷിക്കേണ്ടതെന്നും അദ്ദേഹം കൂട്ടിച്ചേർത്തു.
മന്ത്രിയായിരുന്നപ്പോഴാണ് സംഭവം നടന്നത്. ആരോപണം ഇ പി ഇതുവരെ നിഷേധിച്ചിട്ടില്ല. അധികാര ദുർവിനിയോഗമാണ് ഇ പിയുടെ കാര്യത്തിൽ നടന്നതെന്ന് കെ മുരളീധരൻ ആരോപിച്ചു. പി ജയരാജനെതിരായ കള്ളക്കടത്ത് ആരോപണം പാർട്ടി അന്വേഷിക്കട്ടെയെന്നും കെ മുരളീധരൻ നിർദേശിച്ചു.
ഇ പി ജയരാജനെതിരെ സംസ്ഥാന കമ്മിറ്റിയിലാണ് പി ജയരാജന്‍ ആരോപണം ഉന്നയിച്ചത്. കണ്ണൂരിലെ ആയുർവേദ റിസോർട്ടിന്‍റെ പേരിലായിരുന്നു ആരോപണം. ഇ പി ജയരാജന്‍റെ ഭാര്യയും മകനും ഡയറക്‌ടർമാരായ കമ്പനിയാണ് റിസോർട്ടിന്‍റെ നടത്തിപ്പുകാർ എന്നായിരുന്നു ഉയർന്നുവന്ന ആരോപണം.
അന്വേഷണവും നടപടിയും വേണമെന്ന് പി ജയരാജൻ യോഗത്തിൽ ആവശ്യപ്പെട്ടു. ആരോപണം ഉയർന്ന സംസ്ഥാന കമ്മിറ്റിയിൽ ഇ പി ജയരാജന്‍ പങ്കെടുത്തിരുന്നില്ല. പരാതി എഴുതി നൽകണമെന്നായിരുന്നു സിപിഎം സംസ്ഥാന സെക്രട്ടറി എം വി ഗോവിന്ദൻ നൽകിയ മറുപടി.
Also read: 'ക്വട്ടേഷന്‍ ബന്ധം അന്വേഷിക്കണം'; പി.ജയരാജനെതിരെ പരാതിയുമായി ഇ.പി ജയരാജന്‍ അനുകൂലികള്‍
