കോഴിക്കോട്: പി വി അൻവർ എംഎൽഎയുടെ ഉടമസ്ഥതയിലുള്ള കോഴിക്കോട് കക്കാടംപൊയിലിലെ റിസോർട്ടിനായി നിർമിച്ച തടയണ പൊളിച്ചുതുടങ്ങി. ഹൈക്കോടതി ഉത്തരവിന്‍റെ അടിസ്ഥാനത്തിൽ ഉടമകൾ തന്നെയാണ് തടയണ പൊളിക്കുന്നത്. നാലു വർഷത്തെ നിയമപോരാട്ടത്തിനൊടുവിലാണ് കക്കാടംപൊയിലിലെ പിവിആർ നേച്ചർ എന്ന റിസോർട്ടിലെ നാലു തടയണകൾ പൊളിക്കുന്നത്.
ടൂറിസം പദ്ധതിയുടെ ഭാഗമായി പി വി അന്‍വര്‍ എംഎല്‍എ എല്ലാ നിയമങ്ങളും കാറ്റില്‍പ്പറത്തിയാണ് അതീവ പരിസ്ഥിതി ലോല പ്രദേശമായ കക്കാടംപൊയിലില്‍ പിവിആര്‍ നാച്വറോ റിസോര്‍ട്ടില്‍ പ്രകൃതിദത്ത നീരുറവ തടഞ്ഞ് നാല് തടയണകള്‍ നിർമിച്ചത്. ഇത് വിവാദമായതിനെ തുടർന്നാണ് നിയമ നടപടിയിലേക്ക് നീങ്ങിയത്. കൂടരഞ്ഞി പഞ്ചായത്തും കോഴിക്കോട് കലക്‌ടറും നടപപടിയെടുക്കാതെ പലവട്ടം തടയണ സംരക്ഷിച്ചതും വിവാദങ്ങൾക്ക് ഇടയാക്കി.
തടയണ പൊളിക്കാനുള്ള ഉത്തരവ് നിലനില്‍ക്കെ പി വി അന്‍വര്‍ എംഎല്‍എ തടയണകളും റിസോര്‍ട്ടും നിലനില്‍ക്കുന്ന സ്ഥലം കരാറുകാരനായ ഷഫീഖ് ആലുങ്ങലിന് വില്‍പന നടത്തുകയും ചെയ്‌തു. ഇതിനിടെ തടയണകൾ ഒരു മാസത്തിനകം പൊളിച്ച് നീക്കണമെന്നും ഇതിന്‍റെ ചെലവ് ഉടമകളിൽനിന്ന് ഈടാക്കണമെന്നും ഹൈക്കോടതി ഡിവിഷൻ ബെഞ്ച് ഉത്തരവിടുകയായിരുന്നു.
സ്വാഭാവിക നീരൊഴുക്ക് തടസപ്പെടുത്തുന്ന തടയണകൾ പൊളിച്ചുനീക്കണമെന്ന് കലക്‌ടറുടെയും ഉത്തരവുണ്ടായിരുന്നു. ഇത് ചോദ്യം ചെയ്‌ത റിസോർട്ടിനെതിരെ സമീപത്തെ സ്ഥല ഉടമ നൽകിയ ഹർജി സിംഗിൾ ബെഞ്ച് നേരത്തെ തള്ളിയതിനെ തുടർന്നാണ് ഉടമകൾ ഡിവിഷൻ ബെഞ്ചിനെ സമീപിച്ചത്.
