കുന്ദമംഗലം: ചാത്തമംഗലം എന്‍.ഐ.ടി പരിസരത്ത് നിന്നും മാരക ലഹരി മരുന്നായ എം.ഡി.എം.എയുമായി രണ്ടുപേരെ നാര്‍കോട്ടിക്ക് സ്കോഡ് പിടികൂടി. മലപ്പുറം നിലമ്പൂർ മുണ്ടേരി ചന്ദ്രഭവനത്തിൽ വിഷ്ണു (28), വേങ്ങര ഊരകം വാക്യാത്തൊടി സൽമാൻ ഫാരിസ് (23) എന്നിവരെയാണ് എ.സി.പി ജയകുമാറിന്‍റെ നേതൃത്വത്തിലുള്ള സംഘം പിടികൂടിയത്.
ചില്ലറ വില്‍പനക്കായി ബാംഗ്ലൂരിൽ നിന്നാണ് പ്രതികൾ മയക്കുമരുന്ന് കൊണ്ടുവന്നത്. സമാന രീതിയിൽ മയക്കുമരുന്ന് കടത്തുന്നവര്‍ക്കായി പ്രതികള്‍ക്ക് ബന്ധമുണ്ടെന്നാണ് ലഭിക്കുന്ന വിവരം. പ്രൊഫഷണൽ കോളജുകള്‍ കേന്ദ്രീകരിച്ച് നടക്കുന്ന ലഹരി മാഫിയയുമായും ഇവർക്ക് ബന്ധമുണ്ടോ എന്നും എന്‍.ഐ.ടിയിൽ ഇവർക്ക് ഉപഭോക്താക്കൾ ഉണ്ടോ എന്നും പൊലീസ് പരിശോധിക്കുന്നുണ്ട്. ഒരാഴ്ച മുമ്പ് വില്‍പനക്ക് എത്തിച്ച പത്തു ലക്ഷം വില വരുന്ന ബ്രൗൺ ഷുഗറുമായി ഒരാളെ ആന്‍റി നർക്കോട്ടിക്ക് സ്ക്വാഡ് പിടികൂടിയിരുന്നു.
മയക്കുമരുന്നിന്‍റെ ഉറവിടത്തെപറ്റിയും, പ്രതികളുമായി മയക്കുമരുന്ന് ഇടപാട് നടത്തുന്നവരെ കുറിച്ചും, പ്രതികൾക്ക് ഇതിന് വേണ്ടി സാമ്പത്തിക സഹായം നൽകിയവരെ കുറിച്ചും പൊലീസ് അന്വേഷണം ഊർജ്ജിതമാക്കിയിട്ടുണ്ട്. ഗ്രാമിന് ആയിരത്തി ഇരുനൂറ് രൂപക്ക് വാങ്ങി മൂന്നും നാലും ഇരട്ടി ലാഭത്തിന് ഉപഭോക്താക്കൾക്ക് നൽകി വൻ ലാഭം കൊയ്യുന്നതിനാലാണ് പലരും ഇത്തരം കുറ്റകൃത്യത്തിലേക്ക് തിരിയുന്നതെന്ന് പൊലീസ് പറഞ്ഞു.
പിടികൂടിയവരിൽ സൽമാൻ ഫാരിസിന് കവർച്ചാകേസുകൾ ഉൾപ്പെടെ കോഴിക്കോട്ടും മലപ്പുറത്തുമായി വിവിധ സ്റ്റേഷനുകളിൽ കേസുകളുണ്ട്.
Also Read: കോഴിക്കോട് നഗരത്തിൽ വീണ്ടും മയക്കു മരുന്നു വേട്ട
