കോട്ടയം:പാലാ നഗരസഭയുടെ ഉടമസ്ഥതയിലുള്ള ലക്ഷങ്ങള്‍ വിലമതിക്കുന്ന വാഹനങ്ങള്‍ വെയിലും മഴയും കൊണ്ട് നശിക്കുന്നു. പാലാ ഞൊണ്ടിയാമ്മാക്കല്‍ കവലയിലുള്ള നഗരസഭാ ക്വാട്ടേഴ്‌സ് പരിസരത്താണ് ട്രാക്ടറും റോഡ് റോളറുമടക്കം തുരുമ്പെടുക്കുന്നത്. മാലിന്യശേഖരണത്തിനായി വാങ്ങിയ ടിപ്പറും ഇക്കൂട്ടത്തിൽ തുരുമ്പെടുക്കുന്നുണ്ട്. വാഹനങ്ങള്‍ ലേലം ചെയ്ത് നല്‍കാന്‍ മുമ്പ് ശ്രമം നടന്നിരുന്നെങ്കിലും വാല്യൂവേഷന്‍ കമ്മറ്റി നിശ്ചയിച്ച തുക ഉയര്‍ന്നതായതിനാല്‍ ആരും ലേലം എടുത്തില്ല. റോഡ് റോളര്‍ കോണ്‍ട്രാക്ടര്‍മാര്‍ ഇടയ്ക്ക് വാടക നല്‍കി ഉപയോഗിക്കാന്‍ എടുത്തിരുന്നെങ്കിലും പുതിയ യന്ത്രസംവിധാനങ്ങളായതോടെയാണ് ഇത് ആരും എടുക്കാതായത്.
വാഹനങ്ങള്‍ ലേലം ചെയ്ത് നല്‍കിയാല്‍ നഗരസഭയ്ക്ക് നല്ലൊരു തുക ലഭിക്കും. ഇവ നശിച്ചുപോകുന്നത് തടയാന്‍ നടപടി സ്വീകരിക്കണമെന്ന് അടുത്ത കൗണ്‍സില്‍ യോഗത്തില്‍ ആവശ്യമുന്നയിക്കുമെന്ന് കൗണ്‍സിലര്‍ ബിനു പുളിക്കക്കണ്ടം പറഞ്ഞു. ക്വാട്ടേഴ്‌സ് പരിസരത്ത് കൂട്ടിയിട്ടിരിക്കുന്ന ഫ്‌ളക്‌സുകളും മറ്റ് മാലിന്യങ്ങളും സമീപത്തെ അംഗന്‍വാടിയ്ക്കും ദോഷകരമാവുന്നുണ്ട്.
