കോട്ടയം: പൂഞ്ഞാര്‍ എം.എല്‍.എ സെബാസ്റ്റ്യൻ കുളത്തുങ്കലിന്‍റെ വിമര്‍ശനത്തിനെതിരെ പി.സി ജോർജ്. തനിയ്‌ക്കെതിരെയുള്ള പരാമര്‍ശം വിവരക്കേടാണ്. വിവരക്കേടിന് മറുപടിയില്ലെന്നും അദ്ദേഹം പറഞ്ഞു.
പൂഞ്ഞാര്‍ നിയോജക മണ്ഡലത്തിലെ പ്രകൃതി ദുരന്തത്തിന് ആരാണ് ഉത്തരവാദിയെന്ന തലക്കെട്ടോടെ പി.സി ജോര്‍ജിനെ ഉന്നംവച്ച്, സെബാസ്റ്റ്യൻ കുളത്തുങ്കല്‍ ഫേസ്‌ബുക്കില്‍ കുറിപ്പ് പങ്കുവച്ചിരുന്നു. ഇതിനുള്ള മറുപടിയായാണ് മുന്‍ എം.എല്‍.എ രംഗത്തെത്തിയത്. ആരാണ് പാറമട നടത്തി കുടവയർ വീർപ്പിച്ചതെന്ന് എല്ലാവർക്കും അറിയാമെന്നായിരുന്നു സെബാസ്റ്റ്യൻ കുളത്തുങ്കലിന്‍റെ കുറിപ്പില്‍ പറഞ്ഞത്.
ALSO READ: കെ റെയിൽ : സർക്കാർ മുന്നോട്ടുതന്നെയെന്ന് മന്ത്രി വി അബ്‌ദുറഹിമാൻ
എന്നിട്ടിപ്പോൾ മുൻ എം.എൽ.എ പറയുന്നത് ദുരന്തത്തിന് ഉത്തരവാദി മുഖ്യമന്ത്രിയാണെന്നാണ്. മുൻ എം.എൽ.എയുടെ പ്രസ്‌താവന കാണുമ്പോൾ ഉത്സവപ്പറമ്പിലെ പോക്കറ്റടിക്കാരനെയും എട്ടുകാലി മമ്മൂഞ്ഞിനെയുമാണ് ഓർമ വരുന്നത്. കോട്ടയത്ത് ഏറ്റവുമധികം പാറമടകൾ ഉള്ളത് പൂഞ്ഞാറിൽ അല്ലേ.
അവിടെ ആരായിരുന്നു വർഷങ്ങളായി എം.എൽ.എ ആയിരുന്നത്. ഗാഡ്‌ഗില്‍ റിപ്പോർട്ട് നടപ്പാക്കണമെന്ന് പറഞ്ഞ പരിസ്ഥിതിവാദികളെ അടിക്കണമെന്ന് പറഞ്ഞത് ആരാണെന്നും സെബാസ്റ്റ്യൻ കുളത്തുങ്കൽ ചോദിച്ചു.
