കോട്ടയം: എട്ടാം ക്ലാസുകാരന്‍ സ്വകാര്യ ബസില്‍ നിന്നും തെറിച്ചുവീണു. കോട്ടയം പാക്കിൽ പവർഹൗസ് ജങ്‌ഷനില്‍ ഇന്നലെ (ഒക്‌ടോബര്‍ 7) വൈകുന്നേരത്തോടെയാണ് അപകടം. ബസ് അമിതവേഗതയിലായിരുന്നു എന്ന് തെളിയിക്കുന്ന സിസിടിവി ദൃശ്യങ്ങള്‍ പുറത്ത് വന്നു.
എട്ടാം ക്ലാസ് വിദ്യാര്‍ഥിയായ അഭിരാം എന്ന കുട്ടിക്കാണ് അപകടമുണ്ടായത്. മുഖമടിച്ചാണ് വീണത്. കുട്ടിയുടെ രണ്ട് പല്ലുകള്‍ ഇളകുകയും കൈമുട്ടിനും മുഖത്തും പരിക്കേല്‍ക്കുകയും ചെയ്‌തു. കുട്ടി കോട്ടയം മെഡിക്കൽ കോളജിൽ ചികിത്സ തേടി.
കോട്ടയം-കൈനടി റൂട്ടിലോടുന്ന ചിപ്പി എന്ന സ്വകാര്യ ബസില്‍ നിന്നാണ് അപകടം ഉണ്ടായത്. സംഭവവുമായി ബന്ധപ്പെട്ട് വേണ്ട നടപടികള്‍ ആരംഭിച്ചിട്ടുണ്ടെന്ന് മോട്ടോർ വാഹന വകുപ്പ് അറിയിച്ചു. തിങ്കളാഴ്‌ച ഹാജരാകാനാണ് ബസ് ഡ്രൈവര്‍ക്ക് ആര്‍ടിഒ നിര്‍ദേശം നല്‍കിയിരിക്കുന്നത്. ഓട്ടോമാറ്റിക്ക് ഡോർ സംവിധാനത്തിലെ പ്രശ്നവും അമിത വേഗതയും അപകടത്തിനു കാരണമെന്നാണ് നിഗമനം.
