കോട്ടയം: ഉപതെരഞ്ഞെടുപ്പുകൾക്ക് പിന്നാലെ കേരള കോൺഗ്രസ് എമ്മിൽ അധികാരത്തർക്കം രൂക്ഷം. നിയമസഭാ സമ്മേളനം ആരംഭിക്കാനിരിക്കെ കക്ഷി നേതാവിനെ തെരഞ്ഞെടുക്കുന്നതിനുള്ള യോഗത്തിൽ പങ്കെടുക്കണമെന്നവശ്യപ്പെട്ട് റോഷി അഗസ്റ്റിൻ എംഎൽഎ, എൻ ജയരാജ് എംഎൽഎ എന്നിവർക്ക് ചെയര്‍മാന്‍ ഇന്‍ ചാര്‍ജ് പിജെ ജോസഫ് കത്തയച്ചിരുന്നു. എന്നാൽ യോഗത്തിൽ പങ്കെടുക്കേണ്ടതില്ലെന്ന നിലപാടിലാണ് ജോസ് കെ മാണി പക്ഷം. പാർലമെന്‍ററി പാർട്ടി യോഗം വിളിക്കാൻ ജോസ് കെ മാണിക്കാണ് അധികാരമെന്ന് എംഎൽഎമാരായ റോഷി അഗസ്റ്റിനും എൻ ജയരാജും പറയുന്നു.
കോടതി വിധി വരാനിരിക്കെ യോഗം നടത്തരുതെന്നാണ് ജോസ് വിഭാഗത്തിന്‍റെ നിലപാട്. ഇതിനിടെ നിയമസഭയിൽ തൽസ്ഥിതി തുടരണമെന്ന് ജോസ് പക്ഷം സ്പീക്കറോട് ആവശ്യപ്പെട്ടു. തൊട്ടുപിന്നാലെയാണ് കോട്ടയത്ത് നടത്താനിരുന്ന യോഗം നവംബർ രണ്ടിലേക്ക് മാറ്റി വച്ചതായി പി.ജെ ജോസഫ് അറിയിച്ചത്.
പാലാ സീറ്റിൽ കേരള കോൺഗ്രസ് സ്ഥാനാർഥി പരാജയപ്പെട്ടതോടെ സഭയിൽ പി ജെ ജോസഫ് പക്ഷത്തിനാണ് മേൽക്കൈ. ഈ അവസരം മുതലെടുത്ത് ദുർബലരായ ജോസ് വിഭാഗത്തെകൊണ്ട് തന്റെ നേതൃത്വം അംഗീകരിപ്പിക്കാനാണ് ജോസഫ് വിഭാഗത്തിന്‍റെ നീക്കം. സമ്മേളനം ആരംഭിക്കുമ്പോൾ സഭയ്ക്കുള്ളിലും കേരള കോൺഗ്രസ് രണ്ട് തട്ടിലാകുമെന്ന സൂചനകളാണ് പുറത്തു വരുന്നത്.
