കോട്ടയം : അക്ഷരനഗരിയുടെ മുഖമുദ്രയായി പ്രശോഭിക്കുന്ന ഗാന്ധി പ്രതിമയ്ക്ക് 50 വയസ്. നഗരത്തിന്‍റെ ഹൃദയ ഭാഗത്ത് 1971 ഒക്‌ടോബർ രണ്ടിന് ഗാന്ധിജയന്തി ദിനത്തിലാണ് ഇത് സ്ഥാപിച്ചത്.
കോട്ടയം നഗരത്തിലെ രാഷ്ട്രീയ സാംസ്‌കാരിക കൂട്ടായ്‌മകൾക്കും പ്രതിഷേധങ്ങൾക്കും ഗാന്ധി പ്രതിമ നിലകൊള്ളുന്ന സ്ക്വയർ സാക്ഷിയാണ്. ചരിത്രമുറങ്ങുന്ന കോട്ടയം തിരുനക്കര മൈതാനത്തിന്‍റെ മുൻവശത്ത് നാല് വീഥികൾ ചേരുന്ന ഭാഗത്താണ് ഇത് തലയെടുപ്പോടെ നിലകൊള്ളുന്നത്.
കോട്ടയം-കുമളി റോഡിന് അഭിമുഖമായി, ഒരു കൈയ്യിൽ മുളവടിവും മറുകൈയ്യിൽ ഭഗവദ്ഗീതയും പിടിച്ച് ദണ്ഡി യാത്രയെ അനുസ്‌മരിപ്പിക്കുന്നതാണ് പ്രതിമ. ഏഴേകാൽ അടിയാണ് വെങ്കലം കൊണ്ട് തീർത്ത പ്രതിമയുടെ ഉയരം.
മുബൈയിലെ ഒരു കമ്പനിയാണ് പ്രതിമ നിർമിച്ചത്. ലൈബ്രറി ജങ്‌ഷൻ എന്നറിയപ്പെട്ടിരുന്ന ഇവിടം പ്രതിമ വന്നതോടെ ഗാന്ധി സ്ക്വയറായി. ഗാന്ധിയൻ കെ. കേളപ്പനെയാണ് ഉദ്ഘാടകനായി ആദ്യം തീരുമാനിച്ചിരുന്നതെങ്കിലും പിന്നീട് ഉപരാഷ്ട്രപതി ജി.എസ് പാഠക്കാണ് പ്രതിമ അനാവരണം ചെയ്തത്.
അന്നത്തെ നഗരസഭാധ്യക്ഷൻ എൻ.കെ പൊതുവാൾ, വൈസ് ചെയർമാൻ കെ.എം വർഗീസ് എന്നിവർ നേതൃത്വം നൽകി. ക്ഷേത്രപ്രവേശന വിളംബരത്തെ തുടർന്ന് തുറന്നുകൊടുത്ത തിരുവാർപ്പ്, കുമാരനല്ലൂർ ക്ഷേത്രങ്ങൾ സന്ദർശിക്കാൻ 1937 ൽ ഗാന്ധി കോട്ടയത്ത് എത്തിയപ്പോൾ ചരിത്രപ്രസിദ്ധമായ പ്രസംഗം നടത്തിയ തിരുനക്കര മൈതാനത്തിന് തൊട്ടുമുന്നിലാണ് പ്രതിമ സ്ഥാപിച്ചിരിക്കുന്നത്.
ആദ്യകാല വായനക്കൂട്ടം ഇവിടെയായിരുന്നു. ഗാന്ധി പ്രതിമയോട് തൊട്ടുചേർന്ന് വടക്കുവശത്തായിരുന്നു കോട്ടയം പബ്ലിക് ലൈബ്രറി തുടക്കത്തിൽ പ്രവർത്തിച്ചിരുന്നത്. പിന്നീട് ഇവിടെ തന്നെ ബഹുനില പബ്ലിക് ലൈബ്രറി മന്ദിരം 1964 ൽ ഉദ്ഘാടനം ചെയ്തത് പ്രധാന മന്ത്രിയായിരുന്ന ഇന്ദിരാഗാന്ധിയായിരുന്നു.
ALSO READ: കോട്ടയം മെഡിക്കല്‍ കോളജ് ആദ്യ കരൾ മാറ്റിവയ്ക്കൽ ശസ്ത്രക്രിയയ്ക്ക് സജ്ജമാകുന്നു
'നിങ്ങൾ മനുഷ്യനായതുകൊണ്ട് മാത്രം വലിയവനാകുന്നില്ല, മനുഷ്യത്വമുള്ളവനാകുമ്പോഴാണ് വലിയവനാകുന്നത്'- എന്ന ഗാന്ധിജിയുടെ ആപ്‌തവാക്യം പ്രതിമ മണ്ഡപത്തിൽ രേഖപ്പെടുത്തിയിട്ടുണ്ട്.
ഏഴുവർഷം മുൻപ് അറ്റകുറ്റപണികൾ നടത്തി മാർബിൾ പാകി നഗരസഭ ഗാന്ധി സ്ക്വയർ നവീകരിച്ചിരുന്നു. വാർഷിക മിനുക്ക് പണികൾ ഗാന്ധിജയന്തിയോടനുബന്ധിച്ചാണ് നടക്കുക.
പിൽക്കാലത്ത് ട്രാഫിക് പരിഷ്കാരത്തിന്‍റെ ഭാഗമായി പ്രതിമ തിരുനക്കര മൈതാനത്തേക്ക് മാറ്റി സ്ഥാപിക്കാൻ നഗരസഭ ആലോചിച്ചെങ്കിലും എതിർപ്പിനെ തുടർന്ന് തീരുമാനം മാറ്റി.
അര നൂറ്റാണ്ട് തികയുന്ന ദിവസം പ്രതിമ പൂക്കളാൽ അലങ്കരിക്കുമെന്നും പുഷ്‌പാർച്ചന നടത്തുമെന്നും നഗരസഭ ആക്‌ടിങ് ചെയർമാൻ ബി. ഗോപകുമാർ പറഞ്ഞു.
