കൊല്ലം: സ്കൂൾ പരിസരത്ത് ലൈംഗിക പ്രദർശനം നടത്തിയ യുവാവ് അറസ്റ്റിലായി. പള്ളിമൺ പുനരുർ ശങ്കർ എന്ന് വിളിക്കുന്ന രാഗേഷ് (24) ആണ് അറസ്റ്റിലായത്. പള്ളിമൺ സ്കൂൾ പരിസരത്ത് വച്ചായിരുന്നു സംഭവം. സ്കൂളിൽ നിന്നും പോകുകയായിരുന്ന പെൺകുട്ടിയുടെ മുന്നിൽ വച്ചാണ് പ്രതി നഗ്നത പ്രദർശനം നടത്തുകയും പിന്നാലെ നടന്ന് ശല്യം ചെയ്യുകയും ചെയ്തത്.
സംഭവത്തില്‍ വിദ്യാര്‍ഥി പൊലീസില്‍ പരാതി നല്‍കിയെങ്കിലും ഇയാള്‍ ഒളിവില്‍ പോയി. കുട്ടിയുടെ മൊഴി രേഖപെടുത്തി പോക്സോ നിയമ പ്രകാരം കണ്ണാനല്ലൂർ പൊലീസ് കേസെടുത്തു. പിന്നീടാണ് ഇയാളെ അറസ്റ്റ് ചെയ്തത്. കഞ്ചാവ് വിൽപ്പന നടത്തിയ കേസിൽ പ്രതി ശിക്ഷ കഴിഞ്ഞ് പുറത്തിറങ്ങിയതിന് പിന്നാലെയാണ് ഈ സംഭവം ഉണ്ടായത്. കൂടാതെ നിരവധി കേസുകളിലും ഇയാള്‍ പ്രതിയാണ്.
പൊതുജനങ്ങളുടെ സ്വൈര്യ ജീവിതത്തിന് നിരന്തരം ശല്യമാകുന്ന പ്രതിക്കെതിരെ കരുതൽ തടങ്കൽ ഉൾപ്പെടെയുള്ള നടപടികൾ സ്വീകരിക്കുമെന്ന് കണ്ണാനല്ലൂർ പൊലീസ് അറിയിച്ചു. പ്രതിയെ കൊട്ടാരക്കര കോടതിയിൽ ഹാജരാക്കി റിമാൻഡ് ചെയ്തു.
