കൊല്ലം: തേവലക്കരയിൽ അമ്മയും മകനും വീടിനുള്ളിൽ പൊള്ളലേറ്റ് മരിച്ച നിലയിൽ. അരിനെല്ലൂർ സന്തോഷ് ഭവനിൽ ലില്ലി, മകൻ സെക്രട്ടേറിയറ്റ് ജീവനക്കാരനായ സോണി എന്നിവരാണ് മരിച്ചത്. ഇന്ന് രാവിലെയായിരുന്നു സംഭവം.
ലില്ലിയുടെ വീടിനു സമീപം പുകയുടെ ഗന്ധം ഉയര്‍ന്നത് സമീപവാസികൾ ശ്രദ്ധിച്ചിരുന്നു. എന്നാൽ, പ്ലാസ്‌റ്റിക് കൂട്ടിയിട്ട് കത്തിച്ചതിന്‍റെ ഗന്ധമാണെന്നാണ് കരുതിയത്. പിന്നിട് വീടിന്‍റെ മേല്‍ക്കൂരയിലൂടെ പുക ഉയര്‍ന്നതോടെ പൊലീസിനെയും ഫയർഫോഴ്‌സിനെയും സമീപവാസികള്‍ വിവരം അറിയിക്കുകയായിരുന്നു.
പൊലീസും ഫയര്‍ഫോഴ്‌സും നടത്തിയ പരിശോധനയിൽ വീട്ടിനുള്ളിലാകെ തീയും പുകയും നിറഞ്ഞ അവസ്ഥയിലായിരുന്നു. വാതിൽ തകർത്താണ് സംഘം അകത്ത് കയറിയത്. വീടിന്‍റെ ഗെയിറ്റും അകത്ത് നിന്ന് പൂട്ടിയിരുന്നു.
ഹാളിലാണ് ഇരുവരുടേയും മൃതദേഹങ്ങൾ കണ്ടെത്തിയത്. വീട്ടിൽ നിന്ന് പെട്രോള്‍ ഒഴിച്ചുവച്ചിരുന്ന കുപ്പിയും ലഭിച്ചിട്ടുണ്ട്. സോണി മാനസിക വെല്ലുവിളി നേരിടുന്ന ആളാണെന്ന് പ്രദേശവാസികള്‍ പറയുന്നു. ചവറ, ശാസ്‌താംകോട്ട എന്നിവിടങ്ങളിൽ നിന്നെത്തിയ ഫയർഫോഴ്‌സ് സംഘങ്ങളാണ് തീ അണച്ചത്. തെക്കുംഭാഗം പൊലീസ് അസ്വാഭാവിക മരണത്തിന് കേസെടുത്തു.
