കൊല്ലം : കർക്കടകത്തിന് ആധ്യാത്മികത നിറയ്‌ക്കുന്ന മാസാചരണത്തിന് ഇന്ന് തുടക്കം. രാമായണ പാരായണത്തിലൂടെ മനസിനെ ശുദ്ധമാക്കാന്‍ കൂടിയുള്ള മാസമാണ് ഹൈന്ദവ വിശ്വാസികള്‍ക്ക് കർക്കടകം. കുളിച്ച് ശുദ്ധിവരുത്തി രാമായണം വായിക്കുന്നത് പുണ്യം ലഭിക്കാനുതകുമെന്നാണ് വിശ്വാസം.
പിതൃതർപ്പണത്തിന് കൂടിയുള്ളതാണ് ഈ മാസം. ആയുര്‍വേദ വിധിപ്രകാരം ഔഷധസേവയ്ക്കും ഉഴിച്ചിലിനും പിഴിച്ചിലിനും പറ്റിയ കാലം. ദേഹരക്ഷയ്ക്ക് ഇത് ഉത്തമമാണെന്നാണ് പഴമക്കാരുടെ വിശ്വാസം. കാർഷികമേഖലയെ സംബന്ധിച്ചിടത്തോളം വരുമാനമൊന്നുമില്ലാത്ത കാലമായതിനാൽ ‘പഞ്ഞമാസം’ എന്നും വിളിക്കപ്പെടുന്നു. രോഗസാധ്യതകള്‍ ഏറെയുള്ള മാസമായും കണക്കാക്കപ്പെടുന്നു.
സൂര്യകിരണങ്ങൾക്ക് ശക്‌തി കുറയുന്നതാണ് രോഗാണുക്കൾ പെരുകാന്‍ കാരണം. ഈ സാഹചര്യങ്ങളില്‍, മനസിന് ശക്‌തി പകരാനുള്ള വഴിയായാണ് രാമായണ മാസത്തെ വിശ്വാസികള്‍ കാണുന്നത്. അന്ധകാരം നീക്കി വിജ്ഞാനത്തിന്‍റെ വെളിച്ചം നല്‍കുന്നതിനായാണ് രാമായണ പാരായണവും അത് ശ്രവിക്കലുമെന്നാണ് സങ്കല്‍പ്പം.
ഒരു മാസത്തെ തികഞ്ഞ ആത്മീയ ജീവിതചര്യ അടുത്ത വര്‍ഷത്തേക്ക് ഗൃഹത്തില്‍ ഐശ്വര്യം കൊണ്ടുവരുമെന്നുമാണ് വിശ്വാസം. കൊവിഡ് മഹാമാരി വിട്ടൊഴിയാത്ത പശ്ചാത്തലത്തില്‍ പ്രതീക്ഷയോടെ നല്ലൊരു കാലത്തേയ്ക്കുള്ള പ്രാര്‍ഥനകൂടിയാണ് വിശ്വാസികളെ സംബന്ധിച്ചിടത്തോളം ഈ മാസം.
