കൊല്ലം : കാരിക്കുഴിയിൽ പൊലീസിന് നേരെ വടിവാൾ വീശിയ ശേഷം രക്ഷപ്പെട്ട പ്രതികളെ കുണ്ടറ പൊലീസ് അതിസാഹസികമായി പിടികൂടി. ആലപ്പുഴ സ്വദേശി ലിബിൻ വർഗീസിനെ തട്ടിക്കൊണ്ട് പോയി മോചന ദ്രവ്യം ആവശ്യപ്പെട്ട കേസിലെ പ്രതികളായ പേരയം ആന്‍റണി ദാസ്, ലിയോ പ്ലാസിഡ് എന്നിവരെയാണ് പൊലീസ് ഒളിസങ്കേതത്തിൽ നിന്നും പിടികൂടിയത്. ഇവിടെയും പ്രതികള്‍ പൊലീസിനെ ആക്രമിച്ച് രക്ഷപ്പെടാൻ ശ്രമിച്ചെങ്കിലും പൊലീസ് പ്രതികളെ കീഴ്പ്പെടുത്തി.
കുപ്രസിദ്ധ ഗുണ്ട പടപ്പക്കര സ്വദേശി ചെങ്കീരി ഷൈജുവിന്‍റെ വീട്ടിൽ ഒളിവിൽ കഴിയുകയായിരുന്നു ഇവർ. പൊലീസ് ചെങ്കീരി ഷൈജു താമസിക്കുന്ന വീട്ടിൽ എത്തി പരിശോധന നടത്തിയെങ്കിലും പ്രതികളെ കണ്ടെത്താന്‍ സാധിച്ചിരുന്നില്ല. എന്നാല്‍, ഈ വീടിനോട് ചേർന്ന് മറ്റൊരു വീട് പൂട്ടി കിടക്കുന്നത് പൊലീസിന്‍റെ ശ്രദ്ധയിൽപ്പെടുകയും, ഇതിന്‍റെ താക്കോൽ ആവശ്യപ്പെട്ടപ്പോൾ ചെങ്കീരി ഷൈജു നൽകുവാന്‍ തയ്യാറായില്ല.
തുടർന്ന് പോലീസ് കതക് തകർത്ത് അകത്ത് കയറുകയും ഒളിച്ചിരുന്ന പ്രതികളെ പിടികൂടുകയുമായിരുന്നു. ശേഷം, പൊലീസിനെ ചെങ്കീരി ഷൈജുവും, പിതാവും ആക്രമിച്ചു. എന്നാൽ ഇവരെയും പൊലീസ് കീഴ്പ്പെടുത്തി സ്റ്റേഷനിലേക്ക് കൊണ്ടുവന്നു.
ആക്രമണത്തിൽ പൊലീസ് ഉദ്യോഗസ്ഥരായ ഡാർവിൻ, രാജേഷ് എന്നിവർക്ക് പരുക്കേറ്റു. ഇവർ കുണ്ടറ താലൂക്കാശുപത്രിയിൽ ചികിത്സയിലാണ്. കുണ്ടറ സിഐ ആർ. രതീഷിന്‍റെ നേതൃത്വത്തിലുള്ള വൻ പൊലീസ് സംഘമാണ് പ്രതികളെ പിടികൂടിയത്.
കഴിഞ്ഞ ദിവസം പ്രതികളെ പിടികൂടാൻ എത്തിയ പൊലീസിന് നേരെ വടിവാൾ വീശി ആക്രമിക്കാൻ ശ്രമിക്കുകയും തുടർന്ന് കാക്കനാട് ഇൻഫോപാർക്ക് സിഐ ബിബിൻ ദാസ് വെടിയുതിർക്കുകയും ചെയ്‌തിരുന്നു. അറസ്റ്റ് ചെയ്‌ത പ്രതികളെ പൊലീസ് ചോദ്യം ചെയ്‌തു വരികയാണ്.
