സർക്കാർ കണ്ണ് തുറക്കണം; കണ്ണ് മൂടിക്കെട്ടി പ്രതിഷേധിച്ച് "യൂണിറ്റി ഓഫ് ബ്യൂട്ടിഷ്യൻസ്"

കൊവിഡ് സാഹചര്യത്തിൽ ശരിയായ സുരക്ഷാ മുൻകരുതലോടെ തൊഴിലിടങ്ങൾ തുറന്ന് പ്രവർത്തിക്കാൻ വേണ്ട സാഹചര്യം ഒരുക്കണമെന്നാണ് ഇവരുടെ ആവശ്യം.

കൊല്ലം:ബാർബർ ബ്യൂട്ടിഷ്യൻസ് തൊഴിലാളികളുടെ പ്രശ്നങ്ങൾ പരിഹരിക്കണമെന്ന അഭ്യർത്ഥനയുമായി ജീവനക്കാരുടെ കണ്ണ് മൂടിക്കെട്ടി പ്രതിഷേധം. കൊവിഡ് പശ്ചാത്തലത്തിൽ കഴിഞ്ഞ പതിനഞ്ച് മാസങ്ങളായി തൊഴിലെടുക്കാനുള്ള അവകാശം നിഷേധിക്കപ്പെട്ടെന്നാണ് ഇവരുടെ പരാതി. "യൂണിറ്റി ഓഫ് ബ്യൂട്ടിഷ്യൻസ്" എന്ന കൂട്ടായ്മയുടെ നേതൃത്വത്തിലാണ് പ്രതിഷേധം സംഘടിപ്പിച്ചത്.

ഉപജീവനത്തിനായി ബാങ്ക് വായ്പകളും മൈക്രോ ഫിനാൻസുകളും മറ്റുമുപയോഗിച്ച് കൊണ്ടാണ് പലരും തൊഴിലിടങ്ങൾ സജ്ജീകരിച്ചിരിക്കുന്നത്. തൊഴിൽ ചെയ്യാൻ സാധിക്കാത്തതിനാൽ വാടകയും മറ്റിതര ചിലവുകളും നൽകാനാകാതെ വൻ ബാധ്യതയാണ് ഈ മേഖല നേരിടുന്നത്. തൊഴിലിനു ഉപയോഗിക്കുന്ന പല ഉപകരണങ്ങളും കടകൾ പ്രവർത്തിക്കാത്തത് മൂലം നശിച്ചു.

ഈ സാഹചര്യത്തിൽ ശരിയായ സുരക്ഷാ മുൻകരുതലോടെ തൊഴിലിടങ്ങൾ തുറന്ന് പ്രവർത്തിക്കാൻ വേണ്ട സാഹചര്യം ഒരുക്കണമെന്നാണ് ഇവർ ആവശ്യപ്പെടുന്നത്. ജില്ലയിലെ ജന പ്രധിനിധികളെ കണ്ട് തങ്ങളുടെ പ്രശ്നങ്ങളെ കുറിച്ചുള്ള നിവേദനം സമർപ്പിച്ചു.

തൊഴിലാളികളുടെ ആവശ്യങ്ങൾ

സുരക്ഷാ മുൻകരുതലോടെ തൊഴിൽ ചെയ്യാൻ അനുവദിക്കുക, അടച്ചിട്ട കാലയളവിലെ വാടക ഇളവ് ലഭിക്കാനുള്ള നടപടികൾ സ്വീകരിക്കുക, പലിശ രഹിത വായ്പ്പകളടക്കമുള്ള സഹായ പദ്ധതികൾ അനുവദിക്കുക തുടങ്ങിയ ആവശ്യങ്ങൾ ഉന്നയിച്ച് കൊണ്ടാണ് പ്രതിഷേധം സംഘടിപ്പിച്ചത്.

Also read :വഴിമാറ്റി പ്രഫുല്‍ പട്ടേല്‍ ; ഔദ്യോഗിക സന്ദർശന പാതയിൽ നിന്ന് കൊച്ചി ഒഴിവാക്കി
യുണിറ്റി ഓഫ് ബ്യൂട്ടീഷ്യൻ പ്രതിനിധികളായ ഷൈമ റാണി, ശീതൾ, അനിതാ തമ്പാൻ, സവിത, ശ്രീകല, വിദ്യാ അനിൽ പ്രീത രാജേഷ് തുടങ്ങിയവർ പ്രതിഷേധത്തിൽ പങ്കെടുത്തു.