കാസർകോട്: പൊതുവിതരണ രംഗം പൂർണമായി ശുദ്ധീകരിക്കുമെന്ന് ഭക്ഷ്യ, സിവിൽ സപ്ലൈസ് വകുപ്പ് മന്ത്രി ജി.ആർ അനിൽ. എല്ലാവർക്കും ഭക്ഷണം ഉറപ്പു വരുത്തുകയാണ് സർക്കാരിന്‍റെ ലക്ഷ്യം. ആദ്യ ഘട്ടത്തിൽ അനർഹർ കൈവശം വച്ചിരിക്കുന്ന മുൻഗണന റേഷൻ കാർഡുകൾ കണ്ടെത്തി അർഹരെ ഉൾപ്പെടുത്തും.
അനര്‍ഹമായി കൈവശം വയ്ക്കുന്ന മുന്‍ഗണന കാര്‍ഡുകള്‍ തിരിച്ചു പിടിക്കുന്നതിനുള്ള നടപടിയിലൂടെ 1.62 ലക്ഷം കാര്‍ഡുകള്‍ തിരിച്ചെത്തിയിട്ടുണ്ട്. ഇനിയും കാര്‍ഡുകള്‍ തിരിച്ചേല്‍പ്പിക്കാത്തവര്‍ക്കെതിരെ കര്‍ശന നടപടി സ്വീകരിക്കും. കേരളത്തില്‍ 43 ശതമാനം പേര്‍ക്കാണ് മുന്‍ഗണന കാര്‍ഡിന് അര്‍ഹതയുള്ളത്. ഇങ്ങനെ അര്‍ഹരായവര്‍ പുറത്താകാന്‍ പാടില്ല.
മുന്‍ഗണന കാര്‍ഡുകള്‍ ഇല്ലാത്തതിനാല്‍ അര്‍ഹതയുള്ളവര്‍ക്ക് ആനുകൂല്യങ്ങള്‍ നിഷേധിക്കപ്പെടുന്ന സ്ഥിതിയുണ്ടാവരുത്. ഒരാള്‍ പോലും പട്ടിണി കിടക്കരുതെന്ന കാഴ്‌ചപ്പാടിലാണ് സംസ്ഥാനത്തെ പൊതുവിതരണ രംഗത്ത് ശുദ്ധീകരണ പ്രക്രിയ ആരംഭിച്ചത്.
ജനുവരി മാസത്തിനകം സംസ്ഥാനത്തെ മുഴുവൻ ജില്ല-താലൂക്ക് സപ്ലെ ഓഫിസുകളിലും ഫ്രണ്ട് ഓഫിസ് ആരംഭിക്കും. ജനങ്ങളുടെ പരാതികൾക്ക് ഉചിതമായ മറുപടി നൽകാൻ ഈ സംവിധാനം പ്രയോജനപ്പെടുത്താം. സപ്ലൈ ഓഫിസുകൾ പൂർണമായും ഇ-ഓഫിസുകളാക്കും.
ഭക്ഷ്യധാന്യ വിതരണത്തിൽ ഗുണനിലവാരത്തിലും അളവിലും തൂക്കത്തിലും കൃത്യത ഉറപ്പു വരുത്തും. ഗോഡൗണുകളിലുള്ള പ്രശ്‌നങ്ങള്‍ പരിഹരിക്കും.
സംസ്ഥാന സർക്കാർ ഒന്നാം വാർഷികം പൂർത്തിയാക്കുന്ന ഘട്ടത്തിൽ സംസ്ഥാനത്തെ മുഴുവൻ റേഷൻ കടകളും നവീകരിക്കുന്ന പ്രവർത്തനങ്ങൾ ആരംഭിക്കും. റേഷൻ കടകളുടെ മുഖച്ഛായ മാറണം. ശുചിത്വമുള്ള കടകൾ വൃത്തിയുള്ള മുറികളിൽ ഭക്ഷ്യധാന്യങ്ങൾ സൂക്ഷിക്കുന്നുവെന്ന് ഉറപ്പ് വരുത്തണമെന്നും മന്ത്രി പറഞ്ഞു.
Also read: കളള ടാക്‌സി ഓടുന്നവരുടെ ലൈസൻസും രജിസ്ട്രേഷനും റദ്ദാക്കുമെന്ന് ഗതാഗത മന്ത്രി
