കണ്ണൂർ : രാജസ്ഥാന്‍ - ചിത്തോർഗഡിലെ സൈനിക സ്‌കൂളിൽ തന്നെ പഠിപ്പിച്ച അധ്യാപിക രത്‌ന നായരെ കാണാൻ കണ്ണൂരിലെ വീട്ടിലെത്തി ഉപരാഷ്ട്രപതി ജഗദീപ് ധൻഖർ. അമൂല്യമായ സ്‌നേഹ സാന്നിധ്യമായാണ് ഉപരാഷ്ട്രപതി അധ്യാപികയ്ക്ക് അരികിലെത്തിയത്. ഒരു വിദ്യാർഥി തന്‍റെ പ്രിയപ്പെട്ട അധ്യാപികയ്ക്ക് നൽകിയ ഗുരുദക്ഷിണ കൂടിയായിരുന്നു ആ സന്ദർശനം.
കാറിൽ നിന്ന് ഇറങ്ങിയ ഉടൻ ജഗദീപ് ധൻഖർ ടീച്ചറുടെ കാൽ തൊട്ട് വന്ദിച്ചു. പിന്നെ അധ്യാപികയുടെ കൈകൾ ചേർത്തുപിടിച്ച് സംസാരിച്ചു. ഒപ്പമുണ്ടായിരുന്ന പത്നി ഡോ സുധേഷ്‌ ധൻഖറിനും തന്‍റെ പ്രിയപ്പെട്ട അധ്യാപികയെ അദ്ദേഹം പരിചയപ്പെടുത്തി. സ്‌പീക്കർ എ എൻ ഷംസീറും ഉപരാഷ്‌ട്രപതിയോടൊപ്പം ഉണ്ടായിരുന്നു.
അരമണിക്കൂറോളം അധ്യാപികയുമായി അദ്ദേഹം വിശേഷങ്ങൾ പങ്കുവച്ചു. ഇളനീരും ചിപ്‌സും നൽകിയാണ് ടീച്ചർ തന്‍റെ ശിഷ്യനെ സത്കരിച്ചത്. വീട്ടിൽ ഉണ്ടാക്കിയ ഇഡ്ഡലിയും ചിപ്‌സും അദ്ദേഹം ഏറെ ആസ്വദിച്ചുകഴിച്ചു. ഒരു ഗുരുവിന് കിട്ടാവുന്ന ഏറ്റവും വലിയ ഗുരുദക്ഷിണയാണ് ഈ സന്ദർശനം എന്ന് രത്‌ന ടീച്ചർ പറഞ്ഞു.
also read : സ്‌കൂള്‍ കെട്ടിടങ്ങള്‍ക്ക് ഫിറ്റ്‌നസ് സര്‍ട്ടിഫിക്കറ്റ് ലഭ്യമാക്കണം, നിര്‍ദേശിച്ച് മുഖ്യമന്ത്രി
അധ്യാപികയ്ക്ക് ചാരിതാർഥ്യം : ശിഷ്യർ ഉന്നത സ്ഥാനങ്ങളിൽ എത്തുന്നതാണ് അധ്യാപകർക്ക് ചാരിതാർഥ്യം നൽകുക. ഈ സന്തോഷം പ്രകടിപ്പിക്കാൻ വാക്കുകളില്ലെന്നായിരുന്നു അവരുടെ പ്രതികരണം. ഉച്ചയ്ക്ക്‌ 1.33 നാണ് വ്യോമസേനയുടെ പ്രത്യേക വിമാനത്തിൽ ജഗദീപ് ധൻഖർ മട്ടന്നൂർ വിമാനത്താവളത്തിൽ ഇറങ്ങിയത്. വിമാനത്താവളത്തിലെ വരവേൽപ്പിനുശേഷം ഉച്ചയ്ക്ക്‌ 1.50 ഓടെ കാർ മാർഗം ചാമ്പാടേക്ക് തിരിച്ചു. 2.20 ന് ചമ്പാട് കാർഗിൽ ബസ് സ്റ്റോപ്പിന് സമീപമുള്ള ' ആനന്ദ് 'എന്ന വീട്ടിൽ എത്തി.
അരമണിക്കൂറിലേറെ അവിടെ ചെലവഴിച്ച് 3.10 ഓടെ വിമാനത്താവളത്തിലേക്ക് ഉപരാഷ്ട്രപതി മടങ്ങി. രത്‌ന ടീച്ചറുടെ സഹോദരൻ വിശ്വനാഥൻ നായർ, മകൾ നിധി, ഭർത്താവ് മൃദുൽ ഇവരുടെ ഒന്നര വയസ് പ്രായമുള്ള മകൾ ഇഷാനി എന്നിവരാണ് ഉപരാഷ്‌ട്രപതിയേയും കുടുംബത്തേയും സ്വീകരിക്കാൻ വസതിയിലുണ്ടായിരുന്നത്. കണ്ണൂരിലെ നവോദയ സ്‌കൂളിലെ പ്രിന്‍സിപ്പാളായിട്ടാണ് ടീച്ചർ വിരമിച്ചത്.
also read : 'മലയാളിയുടെ വിദ്യാഭ്യാസവും അധ്വാനശീലവും രാജ്യത്തിന് മാതൃക' ; കേരള ജനതയെ പ്രശംസിച്ച് ഉപരാഷ്ട്രപതി
ഉപരാഷ്‌ട്രപതിയുടെ വിദ്യാഭ്യാസ കാലം : 1968ലാണ് സ്‌കൂള്‍ പഠനം നിര്‍ത്തി ധന്‍ഖര്‍ പോയത്. പശ്ചിമ ബംഗാളില്‍ ഗവര്‍ണറായിരുന്നപ്പോള്‍, ആശിര്‍വാദവും അനുഗ്രഹവും തേടി ധന്‍ഖര്‍ ടീച്ചറെ വിളിക്കാറുണ്ടായിരുന്നു. ഉപരാഷ്‌ട്രപതിയായപ്പോഴും വിളി തുടർന്നു. 2022 ഓഗസ്റ്റ് 11 നായിരുന്നു ധന്‍ഖര്‍ സത്യപ്രതിജ്ഞ ചെയ്‌ത്‌ അധികാരമേറ്റത്.
also read : ബില്ലുകൾക്ക് അനുമതി കിട്ടിയില്ല, ഗവർണറെ വേദിയിലിരുത്തി പരോക്ഷ വിമർശനവുമായി മുഖ്യമന്ത്രി
രാജസ്ഥാനിലെ ജുന്‍ജുനു ജില്ലയിലെ കര്‍ഷക കുടുംബത്തില്‍ 1951 മെയ് 18നാണ് അദ്ദേഹത്തിന്‍റെ ജനനം. ചിറ്റോര്‍ഗഡിലെ സൈനിക സ്‌കൂളിലായിരുന്നു പ്രാഥമിക വിദ്യാഭ്യാസം. ഊര്‍ജതന്ത്രത്തിലാണ് അദ്ദേഹം ബിരുദമെടുത്തത്. രാജസ്ഥാന്‍ യൂണിവേഴ്‌സിറ്റിയില്‍ നിന്ന് എല്‍എല്‍ബിയും നേടിയിട്ടുണ്ട്.
