കണ്ണൂര്‍ : നാടിന്‍റെ സമഗ്ര വികസനത്തിന് പൊതു-സ്വകാര്യ പങ്കാളിത്തം ഉറപ്പാക്കുന്ന പദ്ധതികള്‍ തദ്ദേശ സ്വയംഭരണ സ്ഥാപനങ്ങള്‍ പ്രാവര്‍ത്തികമാക്കണമെന്ന് നിയമസഭ സ്‌പീക്കര്‍ എഎന്‍ ഷംസീര്‍ (Speaker AN Shamseer) പറഞ്ഞു. തലശ്ശേരി നഗരസഭ 2024-25 വര്‍ഷത്തെ ജനകീയാസൂത്രണത്തിന്‍റെ ഭാഗമായുളള വികസന സെമിനാര്‍ ഉദ്‌ഘാടനം ചെയ്‌തു സംസാരിക്കുകയായിരുന്നു അദ്ദേഹം (Thalassery Municipality Public Planning Development Seminar).
കാലത്തിന്‍റെ മാറ്റങ്ങള്‍ ഉള്‍ക്കൊണ്ട് പദ്ധതികള്‍ പ്രാവര്‍ത്തികമാക്കാന്‍ കഴിയണം. എപ്പോഴും സര്‍ക്കാറിന്‍റെ ഫണ്ടില്‍ നിന്നും മാത്രമേ പദ്ധതി നടപ്പാക്കാനാവൂ എന്നില്ല. പൊതു സ്വകാര്യ പങ്കാളിത്തം ഉറപ്പാക്കിയാലേ ഭാവിയില്‍ വികസന പ്രവര്‍ത്തനങ്ങള്‍ മുന്നോട്ട് കൊണ്ട് പോകാന്‍ കഴിയൂ.
സംരംഭകര്‍ക്ക് നിക്ഷേപങ്ങള്‍ നടത്താനുള്ള സാഹചര്യങ്ങളും ഒരുക്കേണ്ടതുണ്ട്. സ്വതന്ത്രമായി നിക്ഷേപം നടത്തുന്നതിലൂടെ നഗരങ്ങളില്‍ വലിയ മാറ്റങ്ങള്‍ സാധ്യമാകും (Speaker AN Shamseer on Independent investment). വികസനത്തിന് മുന്നില്‍ രാഷ്ട്രീയം മറന്ന് ഒത്തൊരുമിച്ചാലേ നാട് വികസിക്കൂ. ഇത്തരത്തില്‍ യോജിപ്പില്ലെങ്കില്‍ ജനങ്ങളെയാണ് അത് ബാധിക്കുകയെന്ന് സ്‌പീക്കര്‍ പറഞ്ഞു.
