കണ്ണൂര്‍: പയ്യന്നൂർ കാറമേൽ പെരുങ്കളിയാട്ടത്തിന്‍റെ പ്രചാരണത്തിന്റെ ഭാഗമായി മറത്തുകളിയും പൂരക്കളിയും അരങ്ങേറി. മുച്ചിലോട്ട് ഭഗവതി ക്ഷേത്രത്തിൽ ഫെബ്രുവരി ആറ് മുതൽ ഒമ്പത് വരെയാണ് പെരുങ്കളിയാട്ടം.
പെരുങ്കളിയാട്ടത്തിന് മുന്നോടിയായി മറത്തുകളിയും പൂരക്കളിയും അരങ്ങേറി
മുച്ചിലോട്ട് ഭഗവതിയുടെ സഖിയായ കണ്ണങ്ങാട്ട് ഭഗവതിക്ക് വേണ്ടി മുച്ചിലോട്ട് ക്ഷേത്രങ്ങളിൽ പൂരോത്സവ നാളിൽ പൂരക്കളി നടത്താറുണ്ടായിരുന്നു. അതിന്റെ ചുവടുപിടിച്ചാണ് മറത്തുകളിയും പൂരക്കളിയും ക്ഷേത്ര മതിലിന് പുറത്ത് അരങ്ങേറിയത്. കൊടക്കാട് പി.ടി മോഹനൻ പണിക്കരും കൊയോങ്കര രാജീവൻ പണിക്കരും തമ്മിലായിരുന്നു മറത്തുകളി. തുടർന്ന് മോനാച്ച, കുണിയൻ പറമ്പത്ത്, അന്നൂർ, വെള്ളൂർ പൂരക്കളി സംഘങ്ങൾ പൂരക്കളിയും അവതരിപ്പിച്ചു.
