കണ്ണൂര്‍: അയ്യങ്കുന്ന് പഞ്ചായത്തിലെ വളന്തോടില്‍ വീണ്ടും അഞ്ചംഗ മാവോയിസ്റ്റ് സംഘം എത്തിയെന്ന് സൂചന. ഇന്നലെ (24.07.23) വൈകിട്ട് ആറ് മണിയോടെ മാവോയിസ്റ്റ് നേതാവായ സിപി മൊയിദീനും ഒരു സ്ത്രീയും അടങ്ങിയ ആയുധ ധാരികൾ ആയ സംഘം ടൗണിൽ എത്തിയതെന്നാണ് സംശയം. ഇവർ പതിച്ചെന്ന് കരുതുന്ന പോസ്‌റ്റര്‍ അയ്യൻകുന്നു പ്രദേശത്തു കണ്ടെത്തി.
സിപിഐ മാവോയിസ്റ്റ്, കബനി ദളം എന്ന പേരിലാണ് പോസ്‌റ്റര്‍. റിലയൻസ്, വാൾ മാർട് കുത്തക പ്രസ്ഥാനങ്ങളെ കടന്നാക്രമിക്കുക എന്ന വാചകങ്ങൾ ആണ് പോസ്‌റ്ററില്‍ ഉള്ളത്. പോസ്‌റ്റർ പതിച്ച ശേഷം ഇവർ പ്രകടനം നടത്തിയതായും ഇവിടെയുള്ള പ്രദേശവാസികൾ പറയുന്നു.
കറുപ്പ് മഴക്കോട്ടും അണിഞാണ് ഇവർ എത്തിയത് എന്നും ടൗണിൽ പോസ്‌റ്ററുകൾ പതിച്ച സംഘം കവലയിൽ ചെറു പ്രസംഗം നടത്തി സമീപത്തെ ജോയ് എന്ന ആളുടെ കടയിൽ നിന്ന് അരിയും പഞ്ചസാരയും മൈദയും പച്ചക്കറികളും ബേക്കറി സാധനങ്ങളും നോട്ടുബുക്ക് പേന ഉൾപ്പെടെ 1580 രൂപയുടെ സാധനങ്ങൾ വാങ്ങിയെന്നും ഇവർ പറയുന്നു. ഒന്നര മാസത്തിനിടെ രണ്ടാം തവണയാണ് വാളത്തോട് മേഖലയിൽ സംഘം എത്തുന്നത് എന്നാണ് ഇവരുടെ ഭാഷ്യം. എന്നാല്‍ വിശദവിവരങ്ങള്‍ മാധ്യമങ്ങളോട് പറയാന്‍ ഇവർ തയ്യാറായില്ല. തണ്ടർബോൾട്ട് അംഗങ്ങൾ അടങ്ങുന്ന പൊലീസ് സംഘം ഈ മേഖലയിൽ പരിശോധന നടത്തിയെങ്കിലും ഇവരെക്കുറിച്ച് മറ്റു വിവരങ്ങൾ ഒന്നും ലഭിച്ചിരുന്നില്ല.
ഇരിട്ടി എടപ്പുഴയിലും മാവോയിസ്റ്റ് സംഘം: അതേസമയം, ഇക്കഴിഞ്ഞ ജൂണ്‍ മാസം ഇരിട്ടി എടപ്പുഴയിൽ സായുധരായ അഞ്ചംഗ മാവോയിസ്റ്റ് സംഘം പ്രകടനം നടത്തിയിരുന്നു. അയ്യങ്കുന്ന് പഞ്ചായത്തിലെ എടപ്പുഴയിലായിരുന്നു സംഭവം. തോക്കുകൾ കയ്യിലേന്തി എത്തിയ അഞ്ചംഗ സംഘം മുദ്രാവാക്യം വിളിച്ച് പ്രകടനം നടത്തുകയായിരുന്നു.
ടൗണിൽ പ്രസംഗിച്ച ശേഷം പോസ്‌റ്റര്‍ ഒട്ടിച്ചായിരുന്നു ഇവര്‍ മടങ്ങിയത്. തിങ്കളാഴ്‌ച (19.06.2023) വൈകുന്നേരം ആറുമണിയോടെയായിരുന്നു ഇവര്‍ എത്തി കൈപ്പടയിൽ എഴുതിയ പോസ്‌റ്റർ ഒട്ടിച്ച ശേഷം വന്ന വഴിക്കുതന്നെ തിരിച്ചുപോയത്. എടപ്പുഴ കുരിശുമല റോഡിൽ നിന്ന് എത്തിയ സംഘം ടൗണിൽ 300 മീറ്ററോളം ദൂരമായിരുന്നു പ്രകടനം നടത്തിയത്.
വെളിച്ചം മൗലികാവകാശമാണ്. വെളിച്ചം തടയുന്ന ശക്തികൾക്കെതിരെ സംഘം ചേരുക എന്നെഴുതിയ ലഘുലേഖ നൽകുകയും ഒട്ടിക്കുകയും ചെയ്‌തിരുന്നു. ഇരുപത് മിനിറ്റോളം ടൗണിൽ തങ്ങിയ സംഘം റേഷൻ വെട്ടിക്കുറച്ചതടക്കമുള്ള കാര്യങ്ങൾ ചൂണ്ടിക്കാട്ടിയായിരുന്നു പ്രസംഗിച്ചത്.
പോസ്‌റ്ററും ലഘുലേഖയും പതിപ്പിച്ച ശേഷം മടക്കം: ഈ സമയത്ത് മുപ്പതോളം നാട്ടുകാര്‍ സ്ഥലത്ത് ഉണ്ടായിരുന്നു. രണ്ട് കടകളിൽ നിന്നായി പച്ചരി, ഓയിൽ, റൊട്ടി അടക്കമുള്ള സാധനങ്ങളും വാങ്ങിയാണ് വന്ന വഴിക്കുതന്നെ ഇവര്‍ മടങ്ങിയത്. സിപിഐ മാവോയിസ്റ്റ് കബനീദളത്തിന്‍റെ പേരിലായിരുന്നു പോസ്‌റ്ററും ലഘുലേഖയും.
സിപി മൊയ്‌തീന്‍റെ നേതൃത്വത്തിലുള്ള സംഘത്തിൽ ഒരു സ്ത്രീയും ഉണ്ടായിരുന്നു. സിപി മൊയ്‌തീനായിരുന്നു മുദ്രാവാക്യം വിളിക്കാന്‍ നേതൃത്വം നല്‍കിയതും പ്രസംഗിച്ചതും. തിരിച്ചുപോകുന്നതിന് മുന്നേ തങ്ങളെ ഓട്ടോറിക്ഷയിൽ കൊണ്ട് വിടാൻ പറ്റുമോ എന്ന് ഇവർ ചോദിച്ചിരുന്നു.
മെയ്‌ മാസത്തിലും അയ്യങ്കുന്ന് പഞ്ചായത്തിലെ കളിതട്ടും പാറയിലെയും തുടിമരത്തെയും വീടുകളിൽ ഇതേ സംഘം എത്തിയിരുന്നു. അതിനും ഒരു മാസം മുൻപ് ആറളം പഞ്ചായത്തിലെ കീഴ്പ്പള്ളി വിയറ്റ്നാമിലും ഇവർ എത്തിയിരുന്നു.
