കണ്ണൂർ: മട്ടന്നൂരിൽ ടാപ്പിങ് തൊഴിലാളി കണ്ടത് പുലിയെ തന്നെയെന്ന് സ്ഥിരീകരിച്ച് വനംവകുപ്പ്. ഇന്നലെ (ഡിസംബര്‍ 20) പുലർച്ചെയാണ് ടാപ്പിങ് തൊഴിലാളി പുലിയെ കണ്ടുവെന്ന വിവരം പുറത്തുവന്നത്. നേരത്തേ, അയ്യല്ലൂരിൽ കുറുനരിയെ കടിച്ചുകൊന്നിട്ട സ്ഥലത്ത് വനംവകുപ്പ് നിരീക്ഷണ ക്യാമറ വച്ചിരുന്നു. ഈ ക്യാമറ പരിശോധിച്ചതിനെ തുടര്‍ന്നാണ് മട്ടന്നൂരില്‍ പുലി തന്നെയാണ് ഇറങ്ങിയതെന്ന് സ്ഥിരീകരിച്ചത്.
പുലിയെ കണ്ടെത്താനായി പ്രദേശത്ത് തെരച്ചിൽ തുടരുകയാണ്. വനംവകുപ്പ് കൊട്ടിയൂർ റെയ്‌ഞ്ച് ഉദ്യോഗസ്ഥരും മട്ടന്നൂർ പൊലീസുമടക്കമുള്ളവരാണ് തെരച്ചിൽ നടത്തുന്നത്. പ്രദേശത്തുള്ളവർ ജാഗ്രത പാലിക്കണമെന്ന് നിർദേശമുണ്ട്.
