കണ്ണൂര്‍: Madura Thulasi കണ്ണൂര്‍: പഞ്ചസാരയേക്കാൾ 30 ഇരട്ടി മധുരം. പേര് മധുര തുളസി. കടുത്ത പ്രമേഹ രോഗികൾക്കും ഉപയോഗിക്കാം. അധികമാർക്കും അറിയാത്ത മധുര തുളസി കൃഷി ചെയ്ത് വിജയം നേടുകയാണ് പരിയാരം സ്വദേശിയായ കെവി ഷാജി. പ്രമേഹ രോഗ നിയന്ത്രണത്തിനും രക്തസമ്മർദ്ദം കുറയ്‌ക്കാനുമൊക്കെ ഉപയോഗിച്ചു തുടങ്ങിയതോടെയാണ് ഷാജി മധുര തുളസി കൃഷി ചെയ്യാൻ തുടങ്ങിയത്.
തിരുവനന്തപുരത്ത് നിന്ന് ഗ്രോ ബാഗിൽ മധുര തുളസി തൈകൾ നാട്ടിൽ എത്തിച്ചാണ് കൃഷി തുടങ്ങിയത്. മൂന്ന് മാസം കൊണ്ട് ഇവ പൂവിടും. ആ സമയം മുതല്‍ ഇലകൾ എടുത്ത് ഉണക്കി പൊടിച്ചും അല്ലാതെയും ചൂട് വെള്ളത്തിൽ അഞ്ച് മുതൽ ഏഴ് മിനിറ്റ് വരെ തിളപ്പിച്ച് ഉപയോഗിക്കാവുന്നതാണ്.
വീട്ടിൽ കൃഷി വ്യാപിപ്പിച്ചതോടെ നിരവധി പേരാണ് ആവശ്യക്കാരായി ജില്ലയുടെ വിവിധ ഭാഗങ്ങളിൽ നിന്നും ഷാജിയെ തേടി എത്തുന്നത്.
Also Read: കാടിന്‍റെ സര്‍വ വിജ്ഞാന കോശമാണ് ഈ തുളസി
മൂന്ന് ചെടികൾക്ക് എണ്ണത്തിന് 250 രൂപയ്ക്കാണ് ഷാജി വില്‍പ്പന നടത്തുന്നത്. ഒരു ചെടിയിൽ നിന്നും അഞ്ചു വർഷം വരെ ആദായം ലഭിക്കും. ആവശ്യക്കാർക്ക് കൊറിയറിൽ അടക്കം ചെടികൾ ഷാജി ഇപ്പോൾ എത്തിച്ചു നൽകുന്നുണ്ട്.
