കണ്ണൂർ: ഭാഷാഭേദങ്ങൾ കൊണ്ട് സമ്പന്നമാണ് വടക്കൻ ജില്ലകളായ കണ്ണൂരും കാസർകോടും. കൗതുകവും ആശ്ചര്യവും ഒരു പോലെ നിറഞ്ഞ ഈ ജില്ലകളിലെ വാക്കുകൾ പറയുന്നത് കേൾക്കാൻ തന്നെ പ്രത്യേക ഭംഗിയാണ്. കാലിപ്പെറുക്കൽ, തുമ്പോട്ടി, ഇപ്പോളും, ഇപ്പൊറം എന്നു വേണ്ട കൊയക്ക്, തുമ്പോട്ടി, കണ്ടി തുടങ്ങിയ നിരവധി വാക്കുകൾ വടക്കൻ ജില്ലക്കാർക്ക് സ്വന്തമാണ്.
കണ്ണൂർ ഭാഷാഭേദ നിഘണ്ടു: ഇതര ജില്ലക്കാർ ഇവിടുത്തുകാരുടെ ഈ സംസാരം കേട്ട് അമ്പരന്ന് നിൽക്കാറുണ്ട്. അത്രയേറെ വ്യത്യസ്‌തമാണ് കണ്ണൂർ, കാസർക്കോട് സംസാര ശൈലി. ഇത്തരമൊരു സാഹചര്യത്തിൽ വടക്കൻ ജില്ലകളിലേയ്‌ക്ക് വരുന്നവർക്ക് ഇവിടെയുള്ള ഭാഷാഭേദത്തെക്കുറിച്ച് ആഴത്തിലുള്ള അറിവ് നൽകുന്നതിനായാണ് കണ്ണൂർ ഭാഷാഭേദ നിഘണ്ടു തയ്യാറാക്കിയത്. കണ്ണൂർ സർ സയ്യിദ് കോളേജിലെ ഹിന്ദി വിഭാഗം അസോസിയേറ്റ് പ്രൊഫസർ ഡോ. വി ടി വി മോഹനനും, ഭാര്യ തുഞ്ചത്ത് എഴുത്തച്ഛൻ മലയാള സർവകലാശാലയിലെ ഭാഷ ശാസ്‌ത്ര വിഭാഗം അസിസ്റ്റന്‍റ് പ്രൊഫസർ സ്‌മിത കെ നായരുമാണ് ഈ നിഘണ്ടു തയ്യാറാക്കിയത്.
നിഘണ്ടു എന്ന ആശയം വന്ന വഴി: സർ സയ്യിദ് കോളേജിലെ ചായയ്‌ക്ക് ഒപ്പം കിട്ടിയ പലഹാരത്തിന്‍റെ പേരിൽ തോന്നിയ കൗതുകമാണ് പുസ്‌തകത്തിലെക്ക് വി ടി വി മോഹനനെ എത്തിച്ചത്. 12 വർഷത്തെ പരിശ്രമത്തിനൊടുവിലാണ് കണ്ണൂർ ഭാഷാഭേദ നിഘണ്ടു തയ്യാറാക്കുന്നതിനാവശ്യമായ പ്രാദേശിക വാക്കുകൾ കണ്ണൂർ സ്വദേശി കൂടിയായ ഇദ്ദേഹം ശേഖരിച്ചത്. സത്യത്തിൽ കോവിഡ് കാലം നിഘണ്ടു എന്ന ലക്ഷ്യത്തിലേയ്‌ക്കുള്ള അദ്ദേഹത്തിന്‍റെ ദൂരം കൂടുതൽ എളുപ്പമാക്കി എന്ന് തന്നെ പറയാം.
3000 നാട്ടുവാക്കുകളുടെ പൂർണ രൂപം: കണ്ണൂരിലെ 3000 നാട്ടുവാക്കുകൾ ആണ് നിഘണ്ടുവിൽ ഉൾപെടുത്തിയിട്ടുള്ളത്. കണ്ണൂർ ജില്ലയിലെ വിവിധ മതസ്ഥർ, സമുദായങ്ങൾ, പ്രദേശങ്ങൾ തുടങ്ങിയ വിവിധ മേഖലകളിലെ ഭാഷാ വൈജാത്യങ്ങൾ ഈ ഗ്രന്ഥത്തിൽ ഉൾക്കൊള്ളുന്നുണ്ട്. മൂലവാക്ക്, വ്യാകരണ ഭേദം, വാക്കിന്‍റെ ഉത്ഭവം, രണ്ടു കാലങ്ങളായുള്ള വാക്കിന്‍റെ പ്രയോഗം തുടങ്ങിയവ ഉൾക്കൊള്ളുന്ന സമഗ്രമായ റഫറൻസ് ഗ്രന്ഥമാണ് വി ടി വി മോഹനൻ തയ്യാറാക്കിയിരിക്കുന്നത്. വായ്‌മൊഴിയായി തലമുറകൾ കൈമാറി വരികയും പിന്നീട് കൈമോശം വന്നതുമായ വാക്കുകൾ കണ്ടെത്തുന്നതിന് ഏറെ ബുദ്ധിമുട്ടുകൾ നേരിട്ടതായി വി ടി വി മോഹനൻ പറഞ്ഞു.
പുസ്‌തക പ്രകാശനം: കേരള ഭാഷ ഇൻസ്റ്റിറ്റ്യൂട്ടാണ് പുസ്‌തകം പ്രസിദ്ധീകരിക്കുന്നത്. മാർച്ച് 11ന് പിലാത്തറയിൽ വച്ച് നടക്കുന്ന ചടങ്ങിൽ പ്രമുഖ സാഹിത്യകാരൻ ടി പത്മനാഭൻ പുസ്‌തകം പ്രകാശനം ചെയ്യും. തുടർന്നും വാക്കുകൾ ശേഖരിച്ച് രണ്ടാം പതിപ്പ് പുറത്തിറക്കാനുള്ള ഒരുക്കത്തിൽ ആണ് മോഹനനും ഭാര്യയും.
also read: ചുട്ടുപൊള്ളി കണ്ണൂര്‍; ജ്യൂസ് ബാറുകള്‍ സജീവമാകുന്നു, ജീവനക്കാരില്ലാതെ വട്ടംകറങ്ങി അഗ്നിരക്ഷാ സേന
