നെറ്റിപ്പട്ടങ്ങൾക്ക് പിന്നിലെ വളകിലുക്കം; അജിതയുടെ കൈകളില്‍ നെറ്റിപ്പട്ട സൗന്ദര്യം

ഓരോ ചന്ദ്രക്കലയുടേയും അർഥവും എണ്ണവും മാറാതെ സൗന്ദര്യം നിറയുന്ന നെറ്റിപ്പട്ടങ്ങൾ നിർമിക്കുന്ന ഒരു വീട്ടമ്മയുണ്ട് കണ്ണൂരില്‍. കണ്ണപുരം ചുണ്ടയിലെ അജിത പുഞ്ചാൽ  മ്യൂറൽ പെയിന്‍റിങ് പഠന സമയത്താണ് അടുത്ത സുഹൃത്തിൽ നിന്നും നെറ്റിപ്പട്ട നിർമാണം സ്വായത്തമാക്കിയത്.

കണ്ണൂർ: ഉത്സവങ്ങൾക്ക് കരിവീരൻമാർ എഴുന്നള്ളുമ്പോൾ ഏത് പൂരപ്രേമിയും ഒരു നിമിഷം അത്ഭുതത്തോടെ നോക്കി നിന്നു പോകും. കരിവീരൻമാർക്ക് സൗന്ദര്യവും പ്രൗഢിയും പകർന്നു നല്‍കുന്നതില്‍ സ്വർണവർണത്തിലുള്ള നെറ്റിപ്പട്ടങ്ങൾക്ക് നിർണായക സ്ഥാനമുണ്ട്. ഇപ്പോൾ ആനകൾക്ക് മാത്രമല്ല, വീടുകളില്‍ അലങ്കാര വസ്തുവായും നെറ്റിപ്പട്ടങ്ങൾ തിളങ്ങിനില്‍ക്കാറുണ്ട്. ഇത്ര മനോഹരമായി എങ്ങനെയാണ് ചന്ദ്രക്കലയും കുമിളയും ചേർത്ത് നെറ്റിപ്പട്ടം നിർമിക്കുക എന്ന് ആസ്വാദകർ പലപ്പോഴും ഓർത്തുപോകാറുണ്ട്. ഓരോ ചന്ദ്രക്കലയുടേയും അർഥവും എണ്ണവും മാറാതെ സൗന്ദര്യം നിറയുന്ന നെറ്റിപ്പട്ടങ്ങൾ നിർമിക്കുന്ന ഒരു വീട്ടമ്മയുണ്ട് കണ്ണൂരില്‍. കണ്ണപുരം ചുണ്ടയിലെ അജിത പുഞ്ചാൽ മ്യൂറൽ പെയിന്‍റിങ് പഠന സമയത്താണ് അടുത്ത സുഹൃത്തിൽ നിന്നും നെറ്റിപ്പട്ട നിർമാണം സ്വായത്തമാക്കിയത്.

ലാബ് ടെക്‌നീഷ്യൻ ആയ അജിത ജോലി കഴിഞ്ഞുള്ള ഇടവേളകളിലാണ് നെറ്റിപ്പട്ടങ്ങൾ നിർമിച്ചു തുടങ്ങിയത്. വീടുകളിലേക്കും ഷോപ്പുകളിലേക്കുമുള്ള നെറ്റിപ്പട്ടങ്ങൾക്ക് ചെയ്ത് തീർക്കാൻ പറ്റാത്ത അത്ര ഓർഡറുകൾ ഇപ്പോൾ ഉണ്ടെന്ന് അജിത പറയുന്നു. നെറ്റിപ്പട്ട നിർമാണത്തിനുള്ള ആവശ്യ വസ്തുക്കൾ പൂരങ്ങളുടെയും നെറ്റിപ്പട്ടങ്ങളുടെയും നാടായ തൃശൂരിൽ നിന്നാണ് എത്തിക്കുന്നത്. 500 മുതൽ 5000 രൂപ വിലവരുന്ന നെറ്റിപ്പട്ടങ്ങളാണ് നിർമിച്ചു നൽകുന്നത്. ചെറിയ നെറ്റിപ്പട്ടങ്ങൾ ഒരു ദിവസം കൊണ്ടും വലുത് നാല് മുതൽ ഏഴ്‌ ദിവസങ്ങൾ എടുത്തുമാണ് പൂർത്തിയാക്കുന്നത്. ഭർത്താവ് അനിൽകുമാറും അമ്മ ദേവിയും മക്കളായ നന്ദയും നവീനും അടങ്ങുന്ന കുടുംബത്തിന്‍റെ പിന്തുണയാണ് ഈ വീട്ടമ്മയുടെ കരുത്ത്.