കണ്ണൂര്‍: സിപിഎം ജില്ലാ കമ്മിറ്റി യോഗം ഇന്ന് ചേരും. സംസ്ഥാന സമിതിയിലെ തീരുമാനങ്ങൾ ജില്ലാ കമ്മിറ്റിയിൽ റിപ്പോർട്ട് ചെയ്യും. ആന്തൂരില്‍ ആത്മഹത്യ ചെയ്ത പ്രവാസി വ്യവസായിയുടെ കൺവൻഷൻ സെന്ററിന് പ്രവർത്തനാനുമതി വൈകിയ സംഭവത്തിൽ പി കെ ശ്യാമളക്ക് വീഴ്ച പറ്റിയെന്ന പി ജയരാജന്റെ പരസ്യ പ്രസ്‌താവന തിരുത്തി കൊണ്ടുള്ള സംസ്ഥാന സമിതിയുടെ തീരുമാനമായിരിക്കും ഇതിൽ പ്രധാനം. പി കെ ശ്യാമളക്കെതിരെ അച്ചടക്ക നടപടി വേണമെന്ന ആവശ്യത്തിൽ നിന്നും ജില്ലാ നേതൃത്വം പിന്മാറാന്‍ സാധ്യതയുണ്ട്.
നഗരസഭ അധ്യക്ഷ എന്ന നിലയിൽ പി കെ ശ്യാമളക്ക് വീഴ്ച സംഭവിച്ചുവെന്ന പരസ്യ നിലപാടിൽ തന്നെയാണ് പി ജയരാജൻ. ശ്യാമള കൂടി അംഗമായ ജില്ലാ കമ്മിറ്റിയിൽ വിഷയം അവതരിപ്പിച്ച്, വലിയ ചർച്ചകളില്ലാതെ പ്രശ്നം അവസാനിപ്പിച്ചേക്കാം. അതേസമയം തർക്കം തുടർന്നാൽ വിഷയത്തിൽ വീണ്ടും സംസ്ഥാന നേതൃത്വത്തിന് ഇടപെടേണ്ട സാഹചര്യമുണ്ടാകും.
