ഇടുക്കി : കളിയും ചിരിയുമായി ഭിന്നശേഷി കുട്ടികളെ മുഖ്യധാരയിലേക്ക് എത്തിയ്ക്കാനുള്ള ശ്രമത്തിലാണ് ഇടുക്കി നെടുങ്കണ്ടം ബിആര്‍സി പ്രവര്‍ത്തകര്‍. പാട്ടും നൃത്തവും ചിത്രരചനയും നിര്‍മാണ ശില്‍പശാലകളും ഉള്‍പ്പടെ കുട്ടികളുടെ കഴിവുകള്‍ വികസിപ്പിക്കുന്നതിനായി വിവിധ പരിപാടികളാണ് നെടുങ്കണ്ടം ബിആര്‍സിയുടെ നേതൃത്വത്തില്‍ നടത്തുന്നത്.
ചങ്ങാതിക്കൂട്ടം എന്ന പേരില്‍ എട്ട് പഞ്ചായത്തുകളിലെ കുട്ടികളെ ഉള്‍പ്പെടുത്തിയാണ് പരിപാടികള്‍ സംഘടിപ്പിക്കുന്നത്. ഭിന്നശേഷി വാരാചരണത്തോടനുബന്ധിച്ച് കൊവിഡ് കാലത്ത് സ്‌കൂളില്‍ പോകാനാവാത്ത കുട്ടികളെ വീടുകളില്‍ എത്തി പ്രവര്‍ത്തകര്‍ സന്ദര്‍ശിച്ചു.
മധുരപലഹാരങ്ങളും സമ്മാന പൊതികളുമായാണ് നെടുങ്കണ്ടം ബിആര്‍സി പ്രവര്‍ത്തകര്‍ ഭിന്നശേഷി കുട്ടികളുടെ വീടുകളില്‍ എത്തിയത്. രക്ഷാകര്‍ത്താക്കള്‍ക്കായി ബോധവത്കരണ ക്ലാസും പ്രവര്‍ത്തകര്‍ സംഘടിപ്പിച്ചിരുന്നു.
