ഇടുക്കി : മൂന്നാറില്‍, ജനവാസ മേഖലയില്‍ വീണ്ടും പടയപ്പ എന്ന കാട്ടാനയുടെ ആക്രമണം. ഇന്നലെ രാത്രി പതിനൊന്ന് മണിയോടെയാണ്, തോട്ടം മേഖലയായ മൂന്നാര്‍ കന്നിമല എസ്‌റ്റേറ്റില്‍ പടയപ്പ എത്തിയത്. മേഖലയിലെ കമ്പനിവക ക്വാര്‍ട്ടേഴ്‌സുകള്‍ക്ക് നേരെ നടത്തിയ ആക്രമണത്തില്‍ കെട്ടിടങ്ങളുടെ ജനല്‍ ചില്ലുകള്‍ തകര്‍ത്തു. കൃഷി നശിപ്പിക്കുകയും ചെയ്‌തു.
മേഖലയില്‍ മണിക്കൂറുകളോളം നിലയുറപ്പിച്ച ശേഷം, പുലര്‍ച്ചെയാണ് ആന കാട്ടിലേയ്ക്ക് മടങ്ങിയത്. കഴിഞ്ഞ ദിവസം പകല്‍ സമയത്തും പടയപ്പ ജനവാസ മേഖലയില്‍ എത്തിയിരുന്നു. ഇതേത്തുടര്‍ന്ന് പ്രദേശവാസികള്‍ക്കിടയില്‍ ഭീതി പടര്‍ന്നിരിക്കുകയാണ്.
അതേസമയം, അപകടകാരിയായ അരിക്കൊമ്പനെ മയക്കുവെടിവച്ച് പിടികൂടുന്നതിനുള്ള നടപടികള്‍ വനം വകുപ്പ് ഉടന്‍ ആരംഭിക്കും. ഇതിന് മുന്നോടിയായി, സിസിഎഫിന്‍റെയും ചീഫ് വെറ്റിനറി സര്‍ജന്‍റെയും നേതൃത്വത്തില്‍, ഉന്നതതല യോഗം ഓണ്‍ലൈനായി ചേര്‍ന്നു. ചിന്നക്കനാല്‍ 301 കോളനിയില്‍ അരിക്കൊമ്പനെ എത്തിച്ച്, പിടികൂടുന്നതിനാവും പ്രാഥമിക പരിഗണന നല്‍കുക.
ഈ മേഖലയില്‍ കൂട് സ്ഥാപിക്കാനും തീരുമാനമായിട്ടുണ്ട്. പിടികൂടിയ ശേഷം ആനയെ, കോടനാട്ടിലേയ്‌ക്കോ, റേഡിയോ കോളര്‍ ഘടിപ്പിച്ച്, പെരിയാര്‍ വന്യ ജീവി സങ്കേതത്തിലേയ്‌ക്കോ മാറ്റും.
