ഇടുക്കി: കുളമാവിന് സമീപം അൽഷിമേഴ്‌സ് രോഗിയായ ഭർത്താവിന്‍റെ കഴുത്ത് മുറിച്ച ശേഷം ഭാര്യ മരിച്ച നിലയില്‍. കുളമാവിന് സമീപം കരിപ്പിലങ്ങാടാണ് സംഭവമുണ്ടായത്. കരിപ്പിലങ്ങാട് കുളപ്പുറത്ത് സുകുമാരന്‍റെ ഭാര്യ മിനിയാണ് മരണപ്പെട്ടത്. സുകുമാരന്‍റെ നില അതീവ ഗുരുതരമായി തുടരുകയാണ്.
ഇന്ന് രാവിലെ വീട്ടുജോലിക്കാരി എത്തിയപ്പോഴാണ് ദാരുണ സംഭവം അറിയുന്നത്. മിനിയെ കണ്ടെത്തിയതിന് തൊട്ടടുത്ത് തന്നെ സുകുമാരനെ കഴുത്തറുത്ത നിലയിൽ കണ്ടെത്തുകയായിരുന്നു. കഴിഞ്ഞ മൂന്ന് വർഷമായി കിടപ്പുരോഗിയാണ് സുകുമാരൻ.
ജോലിക്കാരി കുളമാവ് പൊലീസ് സ്റ്റേഷനിൽ വിവരം അറിയിച്ചതിനെ തുടർന്ന് സ്ഥലത്തെത്തിയ പൊലീസ് സുകുമാരനെ തൊടുപുഴയിലെ സ്വകാര്യ ആശുപത്രിയിൽ പ്രവേശിപ്പിക്കുകയായിരുന്നു. കഴുത്തിലെ ഞരമ്പ് മുറിഞ്ഞ സുകുമാരൻ അതീവ ഗുരുതരാവസ്ഥയിലാണെന്നാണ് ആശുപത്രി വൃത്തങ്ങൾ സൂചിപ്പിക്കുന്നത്.
അതേസമയം സുകുമാരനെ കഴുത്തറുത്ത് കൊലപ്പെടുത്താൻ ശ്രമിച്ച ശേഷം മിനി ആത്മഹത്യ ചെയ്‌തുവെന്ന പ്രാഥമിക നിഗമനത്തിലാണ് പൊലീസ്. സംഭവത്തിൽ കൂടുതൽ അന്വേഷണം തുടരുകയാണ്.
