ഇടുക്കി: കായിക പ്രതിഭകള്‍ക്ക് പരിശീലനം നടത്തുന്നതിനായി ലക്ഷങ്ങള്‍ മുടക്കി നിര്‍മിച്ച ഗ്രൗണ്ടില്‍ മാലിന്യങ്ങള്‍ തള്ളുന്നു. പത്ത് വര്‍ഷങ്ങള്‍ക്ക് മുമ്പ് ശാന്തമ്പാറ പഞ്ചായത്ത് ടൗണിന് സമീപം നിര്‍മിച്ച മിനിസ്റ്റേഡിയത്തിലാണ് മാലിന്യം വലിച്ചെറിയുന്നത്. അരയേക്കര്‍ ഭൂമിയിലാണ് സ്റ്റേഡിയം. ചുറ്റുമതില്‍ നിര്‍മിക്കാത്തതിനാല്‍ സാമൂഹ്യ വിരുദ്ധരാണ് സ്റ്റേഡിയം കയ്യടക്കിവച്ചിരിക്കുന്നത്. നിലവില്‍ കാടുകയറി മൂടിയ സ്റ്റേഡിയത്തിന്റെ പ്രവേശന കവാടമടക്കം മാലിന്യങ്ങൾ കൊണ്ട് നിറഞ്ഞിരിക്കുകയാണ്. ടൗണിലെ വ്യാപാര സ്ഥാപനങ്ങളില്‍ നിന്നാണ് ഇവിടെ വന്‍തോതില്‍ മാലിന്യം നിക്ഷേപിക്കുന്നത്. മാലിന്യ നിക്ഷേപത്തിന് പരിഹാരം കാണുന്നതിനും സ്റ്റേഡിയം വെട്ടിതെളിച്ച് കായിക പ്രതിഭകള്‍ക്ക് പ്രയോജനപ്പെടുത്തുന്നതിനും നടപടി സ്വീകരിക്കണമെന്നതാണ് നാട്ടുകാരുടെ ആവശ്യം.
ലക്ഷങ്ങള്‍ മുടക്കി നിര്‍മിച്ച ഗ്രൗണ്ടില്‍ മാലിന്യങ്ങള്‍ തള്ളുന്നു
