ഇടുക്കി : ആശങ്കാസാഹചര്യത്തില്‍ ഡാമിന്‍റെ രണ്ട് ഷട്ടര്‍ തുറന്ന ഒക്‌ടോബർ 29 മുല്ലപ്പെരിയാറിനെ സംബന്ധിച്ച് മറ്റൊരു സവിശേഷ ദിനമാണ്. ഇതേദിനത്തിലാണ് മുല്ലപ്പെരിയാർ അണക്കെട്ടിന്‍റെ പിറവിയുമായി ബന്ധപ്പെട്ട് ആദ്യ കരാർ ഒപ്പുവയ്ക്കുന്നത്. 135 വർഷങ്ങൾക്ക് മുൻപ് തിരുവിതാംകൂർ മഹാരാജാവും ബ്രിട്ടീഷ് സർക്കാരും തമ്മിലാണ് കരാർ ഒപ്പിട്ടത്.
1886 ഒക്‌ടോബർ 29നാണ് തിരുവിതാംകൂറിന് വേണ്ടി ദിവാൻ വി.രാമഅയ്യങ്കാറും, മദ്രാസ് സംസ്ഥാനത്തിന് വേണ്ടി സ്റ്റേറ്റ് സെക്രട്ടറി ജോൺ ചൈൽഡ് ഹാനിങ്‌ടണും പെരിയാർ കരാറിൽ ഒപ്പുവയ്ക്കുന്നത്. മദ്രാസ് സംസ്ഥാനത്തെ മധുര, രാമനാഥപുരം തുടങ്ങിയ ജില്ലകളിലേക്കുള്ള ജലസേചനത്തിനായി കരാർ നടപ്പിലാക്കുകയായിരുന്നു.
ALSO READ: കാണാം... മുല്ലപ്പെരിയാര്‍ ഡാം തുറക്കുന്ന ദൃശ്യം
പെരിയാർ നദിയുടെ പോഷക നദിയായ മുല്ലപ്പെരിയാറിൽ അണക്കെട്ട് നിർമ്മിച്ച് മദ്രാസ് സംസ്ഥാനത്തിന്‍റെ വിവിധ മേഖലകളിൽ വെള്ളമെത്തിക്കുക എന്നതിനായിരുന്നു കരാർ. വെള്ളം നൽകുന്നതിന് കരാർ തുകയും നിശ്ചയിച്ചിരുന്നു.
999 വർഷത്തേക്ക് 80100 ഏക്കർ സ്ഥലത്തിന് വർഷത്തിൽ 40000 രൂപയാണ് തിരുവിതാംകൂറിന് നൽകി വന്നിരുന്നത്. 1886 കരാർ ഒപ്പിട്ട് 1887ൽ അണക്കെട്ടിന്‍റെ പണി തുടങ്ങി. 1896 ഫെബ്രുവരിയിൽ നിർമാണം പൂർത്തിയായി.
