ഇടുക്കി: പൊന്മുടി ഹൈഡല്‍ ടൂറിസം പദ്ധതിയ്ക്കായി ഭൂമി കൈമാറ്റം ചെയ്തതതില്‍ രേഖകള്‍ ഹാജരാക്കാന്‍ കാണിച്ച് റവന്യൂ വകുപ്പ് നോട്ടീസ് നല്‍കി. കെഎസ്ഇബി, ഡാം സേഫ്റ്റി എന്നിവര്‍ക്കാണ് ഉടുമ്പന്‍ചോല എല്‍ആര്‍ തഹസില്‍ദാര്‍ ജയേഷ് നോട്ടീസ് അയച്ചത്. പതിനഞ്ച് ദിവസത്തിനകം രേഖകള്‍ ഹാജരാക്കാനാണ് നോട്ടീസില്‍ നിര്‍ദ്ദേശം.
പൊന്മുടിയില്‍ ഹൈഡല്‍ ടൂറിസം പദ്ധതിയ്ക്കായി റവന്യൂ വകുപ്പില്‍ നിന്നും പാട്ടത്തിനെടുത്ത ഭൂമിയാണ് കെഎസ്ഇബി ബാങ്കിന് നല്‍കിയതെന്നും ഇത് നിയമവിരുദ്ധമാണെന്നും ആരോപണം ഉയര്‍ന്ന സാഹചര്യത്തില്‍ ഭൂമി തിട്ടപ്പെടുത്തുന്നതിന് നടപടിയുമായി റവന്യൂ വകുപ്പ് രംഗത്തെത്തിയത്. ഇതിന്‍റെ ഭാഗമായി പരിശോധനകള്‍ക്കെത്തിയ സര്‍വേ സംഘത്തെ ബാങ്ക് ഭരണസമതി തടയുയും തിരിച്ചയക്കുകയും ചെയ്തു. മുന്‍കൂട്ടി അറിയിക്കാതെയുള്ള പരിശോധനകള്‍ അനുവധിക്കില്ലെന്ന നിലപാട് ബാങ്ക് ഭരണസമതി സ്വീകരിച്ചതോടെയാണ് പരിശോധന നടത്താതെ അന്ന് സംഘം മടങ്ങിയത്.
Also Read: ടൂറിസം മേഖല ഉണരുന്നു; സഞ്ചാരികളെ ആകർഷിക്കാന്‍ പുതിയ പാക്കേജുകളുമായി ചെറുകിട സംരംഭകര്‍
വിഷയത്തില്‍ ജില്ല കലക്ടര്‍ അടക്കം ഇപെടുകയും നോട്ടീസ് നല്‍കി പരിശോധന നടപടികളുമായു മുമ്പോട്ട് പോകാന്‍ നിര്‍ദ്ദേശിക്കുകയും ചെയ്തിരുന്നു. ഇതിന്‍റെ അടിസ്ഥാനത്തിലാണ് നിലവില്‍ എല്‍ആര്‍ തഹസില്‍ദാര്‍ ജയേഷ് നോട്ടീസ് നല്‍കിയിരിക്കുന്നത്. ഭൂമി സംബന്ധിക്കുന്ന രേഖകള്‍ ഹാജരാക്കാനാണ് നോട്ടീസ് നല്‍കിയിരിക്കുന്നത്. ബാങ്കിനും. കെഎസ്ഇബിയ്ക്കും. ഡാം സേഫ്റ്റി വിഭാഗത്തിനുമാണ് നോട്ടീസ് അയച്ചത്. കത്ത് കിട്ടി പതിനഞ്ച് ദിവസത്തിനുള്ളില്‍ രേഖകള്‍ ഹാജരാക്കണമെന്നാണ് നിര്‍ദ്ദേശം.
ആദ്യ ഘട്ടത്തില്‍ രേഖകള്‍ പരിശോധിക്കുകയും ഇതില്‍ നിന്നും കെഎസ്ഇബി പാട്ടത്തിനെടുത്ത റവന്യൂ ഭൂമിയാണെന്ന് ബോധ്യപ്പെടുകയും ചെയ്താല്‍ സ്ഥലം സര്‍വേ നടത്തുന്നതിനും മറ്റ് നടപടികളുമായി മുമ്പോട്ട് പോകുന്നതിനുമാണ് റവന്യൂ വകുപ്പിന്‍റെ തീരുമാനം.
