ഇടുക്കി: മഴയാണ്, മക്കൾ മുറ്റത്ത് കളിക്കുന്നുണ്ട്... പിന്നെ എല്ലാം ഒരു നിമിഷം കൊണ്ട് അവസാനിച്ചു. ഇടുക്കി ജില്ലയിലെ കൊക്കയാര്‍ പഞ്ചായത്തില്‍ ഉരുള്‍പൊട്ടലില്‍ മരിച്ച ചേരിപ്പുറത്ത് സിയാദിന്‍റെ ഭാര്യ ഫൗസിയ ദുരന്തത്തിന് മുന്‍പ് മലവെള്ളം കുത്തിയൊലിക്കുന്നതിന്‍റെ ദൃശ്യങ്ങള്‍ ബന്ധുവിന് വാട്‌സ്ആപ്പില്‍ അയച്ചു നല്‍കിയിരുന്നു.
തൊട്ടുപിന്നാലെയാണ് കലിതുള്ളി പാഞ്ഞെത്തിയ മലവെള്ളം ഫൗസിയയുടെയും രണ്ടു മക്കളുടെയും ജീവനെടുത്തത്. ഒപ്പം ഫൗസിയയുടെ സഹോദരന്‍റെ മക്കളും മലവെള്ളത്തില്‍ ഒലിച്ചുപോയിരുന്നു.
മലവെള്ളം കുത്തിയൊലിക്കുന്നതിന്‍റെ ദൃശ്യങ്ങളാണ് വിഡിയോയിലുള്ളത്. ഉരുള്‍പൊട്ടലില്‍ മരിച്ച അംന സിയാദ്, അഫ്‌സാന്‍ ഫൈസല്‍ എന്നിവരെയും വിഡിയോയില്‍ കാണാം. വിഡിയോ പകര്‍ത്തി നിമിഷങ്ങൾക്കകം ഉരുള്‍പൊട്ടലില്‍ വീടും അഞ്ച് കുടുംബാംഗങ്ങളും മണ്ണിനടിയിലായി.
നാലു കുട്ടികള്‍ ഉള്‍പ്പെടെ ആറുപേരുടെ മൃതദേഹങ്ങള്‍ ഇന്നലെ കണ്ടെത്തിയിരുന്നു. ഷാജി ചിറയില്‍ (55), ചേരിപ്പുറത്ത് സിയാദിന്‍റെ ഭാര്യ ഫൗസിയ (28), മകന്‍ അമീന്‍ സിയാദ് (7), മകള്‍ അംന സിയാദ് (7), കല്ലുപുരയ്ക്കല്‍ ഫൈസലിന്‍റെ മക്കളായ അഫ്‌സാന്‍ ഫൈസല്‍ (8), അഹിയാന്‍ ഫൈസല്‍ (4) എന്നിവരുടെ മൃതദേഹമാണ് ഇന്നലെ കണ്ടെത്തിയത്.
