ഇടുക്കി: അടിമാലി നാർകോട്ടിക് എൻഫോഴ്സ്മെന്‍റ് സ്ക്വാഡ് ഇരുമ്പുപാലം പരിശക്കല്ലിൽ നടത്തിയ റെയ്‌ഡിൽ 100 ലിറ്റർ കോടയും ഒന്നര ലിറ്റർ വാറ്റുചാരായവും ചാരായം വാറ്റുന്നതിനുള്ള ഉപകരണങ്ങളുമായി ഒരാൾ പിടിയിൽ. പരിശക്കല്ലിൽ താമസിക്കുന്ന എൽദോസ് (50) എന്നയാളെയാണ് അറസ്റ്റ് ചെയ്‌തത്. പടിക്കപ്പ് കുടി, പരിശക്കല്ല് ഭാഗത്ത് വാറ്റുചാരായ നിർമാണവും വിപണനവും നടക്കുന്നതായി ലഭിച്ച രഹസ്യവിവരത്തിന്‍റെ അടിസ്ഥാനത്തിൽ രണ്ടാഴ്‌ചയായി എൽദോസ് എക്സൈസ് ഷാഡോ വിഭാഗത്തിന്‍റെ നിരീക്ഷണത്തിലായിരുന്നു. ലിറ്ററിന് ആയിരം രൂപയ്ക്കാണ് എൽദോസ് ചാരായം വിറ്റിരുന്നത്. വീടിനു പിന്നിലെ താൽകാലിക ഷെഡിൽ ചാരായം വാറ്റിക്കൊണ്ടിരുന്നപ്പോളാണ് പ്രതിയെ തന്ത്രപരമായി എക്സൈസ് ഉദ്യോഗസ്ഥർ കുടുക്കിയത്.
എക്സൈസ് സർക്കിൾ ഇൻസ്പെക്‌ടർ എം കെ പ്രസാദിന്‍റെ നിർദേശാനുസരണം നടത്തിയ റെയ്‌ഡിൽ പ്രിവന്‍റീവ് ഓഫീസർമാരായ സി എസ് വിനേഷ്‌, കെ വി പ്രദീപ്, സിവിൽ എക്സൈസ് ഓഫീസർമാരായ കെ എസ് മീരാൻ, ഹാരിഷ് മൈതീൻ, രഞ്ജിത്ത് കവിദാസ്‌ ,സച്ചു ശശി എന്നിവർ പങ്കെടുത്തു. പ്രതിയെ ഇന്ന് അടിമാലി കോടതിയിൽ ഹാജരാക്കുമെന്നും എക്സൈസ് സംഘം പറഞ്ഞു.
