മലയോരത്ത് ബസുമതി വിളയിക്കാന്‍ കര്‍ഷകര്‍

അതിഥി തൊഴിലാളികൾ എത്തിച്ചു നൽകിയ വിത്ത് ഉപയോഗിച്ച് ഒരേക്കർ സ്ഥലത്ത് ആരംഭിച്ച കൃഷി വിജയം കണ്ടാൽ വാണിജ്യാടിസ്ഥാനത്തിൽ വിളവിറക്കാനാണ് ഇവരുടെ തീരുമാനം

ഇടുക്കി: ഹൈറേഞ്ചിന്‍റെ കുട്ടനാട് എന്നറിയപ്പെടുന്ന മുട്ടുകാട് പാടശേഖരത്തിൽ ബിരിയാണി അരിയുടെ ഗന്ധം പരത്തി ബസുമതി കൃഷിക്ക് തുടക്കമായി. നെൽകൃഷിയെ നെഞ്ചോട് ചേർത്ത മൂന്ന് കർഷകരാണ് ബസുമതി മലയോരത്ത് വിളയിക്കുന്നത്. പാടശേഖര സമിതി പ്രസിഡന്‍റ് അറക്കൽ ഷിജുവിന്‍റെ നേതൃത്വത്തില്‍ പരീക്ഷണാടിസ്ഥാനത്തിൽ ഇറക്കിയ കൃഷി വിജയിച്ചാൽ വ്യാപകമാക്കാനാണ് തീരുമാനം.

അതിഥി തൊഴിലാളികൾ എത്തിച്ചു നൽകിയ വിത്ത് ഉപയോഗിച്ച് ഒരേക്കർ സ്ഥലത്താണ് കൃഷിയിറക്കിയിരിക്കുന്നത്. വിജയം കണ്ടാൽ വാണിജ്യാടിസ്ഥാനത്തിൽ വിളവിറക്കും.രോഗകീടബാധയും തൊഴിലാളി ക്ഷാമവും കാരണം മലയോരത്ത് നിന്നും പടിയിറങ്ങിയ നെൽകൃഷി തിരികെ കൊണ്ടുവരാനുള്ള ശ്രമമാണ് മുട്ടുകാട്ടില്‍ നടക്കുന്നത്.

വർഷത്തിൽ മൂന്ന് കൃഷിയിറക്കിയിരുന്ന പാടത്ത് ജലക്ഷാമം മൂലം കൃഷി ഒന്നായി ചുരുങ്ങി. അപ്പോഴും ഇവിടുത്തെ കർഷകർ ലാഭം നോക്കി കൃഷി അവസാനിപ്പിച്ചില്ല. ബസുമതിക്ക് വിലയും വിപണി സാധ്യതയും ഉള്ളതിനാൽ നെൽകൃഷി നേരിടുന്ന പ്രതിസന്ധികളെ മറികടക്കാനാകുമെന്ന പ്രതീക്ഷയിലാണ് കർഷകർ.