ഇടുക്കി: നിയമസഭാ തെരെഞ്ഞെടുപ്പിനോട് അനുബന്ധിച്ച് ഇടുക്കിയിലെ അതിർത്തി മേഖലകളിൽ എൻഫോഴ്സ്മെന്‍റ് പ്രവർത്തനം ശക്തിപ്പെടുത്തി. കേരള തമിഴ്നാട് സംയുക്ത ഉദ്യോഗസ്ഥ സംഘമാണ് തെരച്ചിലിന് നേതൃത്വം നല്‍കുക. ഇതുസംബന്ധിച്ച് ഇരു സംസ്ഥാനങ്ങളുടെയും എൻഫോഴ്സ്മെന്‍റ് ഉദ്യോഗസ്ഥരുടെ യോഗം കമ്പം മുനിസിപ്പൽ കോൺഫറൻസ് ഹാളിൽ ചേർന്നു.
ഇടുക്കി ഡെപ്യൂട്ടി എക്സൈസ് കമ്മിഷണർ ജി. പ്രദീപ് , തേനി എ.ഡി.എസ്.പി രാജേന്ദ്രൻ എന്നിവരുടെ നേതൃത്വത്തിലാണ് യോഗം സംഘടിപ്പിച്ചത്. വരും ദിവസങ്ങളിൽ ശക്തമായ സംയുക്ത പരിശോധനകളും അതിർത്തി മേഖലകളിൽ നടക്കും. കേരള തമിഴ്നാട് എക്സൈസ്, പൊലീസ്, വനം വകുപ്പ്, റവന്യൂ ഉദ്യോഗസ്ഥർ യോഗത്തിൽ പങ്കെടുത്തു.
