ഇടുക്കി: മുതിർന്ന സിപിഐ നേതാവ് സി.എ കുര്യൻ ( 88 ) അന്തരിച്ചു. വാർധക്യ സഹജമായ അസുഖങ്ങളെ തുടർന്ന് മൂന്നാര്‍ ജനറൽ ആശുപത്രിയില്‍ ചികിത്സയിലായിരുന്നു. മൂന്ന് തവണ പീരുമേട് എംഎൽഎ ആയിരുന്നു. ഡെപ്യൂട്ടി സ്പീക്കറായും സേവനം അനുഷ്ഠിച്ചിട്ടുണ്ട്. 1933 ൽ കോട്ടയം പുതുപ്പള്ളിയിലായിരുന്നു ജനനം.
തോട്ടമേഖല കേന്ദ്രീകരിച്ച് പൊതുപ്രവർത്തനം ആരംഭിച്ച സി.എ കുര്യൻ 1960 മുതൽ ട്രേഡ് യൂണിയനുകളിൽ സജീവമായി. 1977, 1980, 1996 കാലയളവിൽ പീരുമേട് നിയമസഭ മണ്ഡലത്തിൽ നിന്ന് തെരഞ്ഞെടുക്കപ്പെട്ടു. 1996 ൽ ഡെപ്യൂട്ടി സ്പീക്കറായി. സിപിഐ സംസ്ഥാന എക്‌സിക്യൂട്ടീവ് അംഗം, എഐടിയുസി സംസ്ഥാന സെക്രട്ടറി, ഓള്‍ ഇന്ത്യ പ്ലാന്‍റേഷന്‍ വര്‍ക്കേഴ്‌സ് ഫെഡറേഷന്‍ ജനറല്‍ സെക്രട്ടറി എന്നീ സ്ഥാനങ്ങളിലും പ്രവർത്തിച്ചിട്ടുണ്ട്.
