എറണാകുളം: ആലുവയിൽ പൊള്ളലേറ്റ് ചികിത്സയിലായിരുന്ന ഗർഭിണി മരിച്ചു. ഇടുക്കി സ്വദേശിനിയായ ശരണ്യയാണ് (23) മരിച്ചത്. കഴിഞ്ഞ ദിവസമാണ് ഭർത്താവായ അലക്‌സിന്‍റെ കണ്‍മുന്നിൽ വച്ച് ശരണ്യ ദേഹത്ത് മണ്ണെണ്ണയൊഴിച്ച് തീ കൊളുത്തിയത്.
ഗുരുതരമായ പൊള്ളലേറ്റ ശരണ്യയെ ആലുവയിലെ സ്വകാര്യ ആശുപത്രിയിൽ പ്രവേശിപ്പിച്ചിരുന്നു. ചികിത്സയിലിരിക്കെ ഇന്ന് (ജൂലൈ 22) രാവിലെ 8.30നായിരുന്നു മരണം. ശരണ്യ അഞ്ച് മാസം ഗർഭിണിയായിരുന്നു.
ഇവർ ആലങ്ങാട് എഴുവിച്ചിറയിലെ ജയചന്ദ്രൻ എന്നയാളുടെ വീട്ടിൽ വാടകക്ക് താമസിച്ചു വരികയായിരുന്നു. ശരണ്യയും ഭർത്താവും തമ്മിൽ സ്ഥിരമായി വഴക്ക് ഉണ്ടാകാറുണ്ടെന്നാണ് അയൽവാസികൾ നൽകുന്ന വിവരം. കുടുംബ വഴക്കിനെ തുടർന്നാണ് ശരണ്യ സ്വയം തീ കൊളുത്തിയതെന്നാണ് വിവരം.
സംഭവത്തിൽ ആലുവ പൊലീസ് കേസെടുത്തു. ഇൻക്വസ്റ്റ് നടപടികൾ പൂർത്തിയാക്കി ശേഷം മൃതദേഹം എറണാകുളം മെഡിക്കൽ കോളജിലേക്ക് മാറ്റും. പോസ്റ്റുമോർട്ട നടപടികൾ പൂർത്തിയാക്കിയ ശേഷമായിരിക്കും മൃതദേഹം ബന്ധുക്കൾക്ക് വിട്ടുനൽകുക.
