എറണാകുളം: കാട്ടുപന്നിയെ വെടിവെച്ച കേസിൽ കസ്റ്റഡിയിൽ എടുത്തവരെ വിട്ടയക്കാൻ മുൻ പഞ്ചായത്തംഗത്തിൻ്റെ നേതൃത്വത്തിൽ വനം വകുപ്പ് ഓഫീസിൽ അതിക്രമം. നടപടി ആവശ്യപ്പെട്ട് റെയ്ഞ്ച് ഓഫീസർ പൊലീസിൽ പരാതി നൽകി. പോത്തുപാറ വനത്തിൽ കാട്ടുപന്നിയെ വേട്ടയാടിയ സംഭവത്തിൽ പോത്തുപാറ മണ്ടപത്തിൽ പീറ്റർ, കംമ്പാട്ട് പോൾ എന്നിവരെ കോതമംഗലം റേഞ്ച് ഓഫീസർ പി.കെ.തമ്പിയുടെ നേതൃത്വത്തിൽ ചൊവ്വാഴ്ച്ചയാണ് കസ്റ്റഡിയിൽ എടുത്തത്. ഇവരെ വിട്ടയയ്ക്കണമെന്നാവശ്യപ്പെട്ട് കവളങ്ങാട് പഞ്ചായത്ത് മുൻ അംഗം എബി മോൻ, പുത്തൻപുരയ്ക്കൽ നോബിൾ, ജോമോൻ, പ്രതികളിൽ ഒരാളുടെ ബന്ധുവായ പിണ്ടിമന സ്വദേശി ജോൺസൺ എന്നിവർ ഓഫീസിൽ കയറി ഉദ്യോഗസ്ഥരെ ഭീഷണിപ്പെടുത്തുകയും അസഭ്യം പറയുകയും ജനലും വാതിലും കൊട്ടിയടക്കുകയും ചെയ്തു.
ഫോറസ്റ്റ്‌ ഓഫീസർമാരായ കെ.ആർ.പ്രതീപ് കുമാർ, എസ്.ശരത്ത്, പി.എസ്.മാഹിൻ എന്നിവരെ ഉൾപ്പടെ കയ്യേറ്റം ചെയ്യുകയും റെയ്ഞ്ച് ഓഫീസറുടെ സ്വകാര്യ വാഹനം കേട് വരുത്തുകയും ചെയ്തു.ഡി.എഫ്.ഒ മുവാറ്റുപുഴ ഡി.വൈ.എസ്.പിയുമായി ബന്ധപ്പെട്ട് കോതമംഗലം പൊലീസ് എത്തിയാണ് ഇവരെ ഓഫീസിൽ നിന്ന് പുറത്താക്കിയത്. ഇവർക്കെതിരെ വനപാലകരെ കയ്യേറ്റം ചെയ്തതിനും ഔദ്യോഗിക കൃത്യനിർവ്വഹണം തടസപ്പെടുത്തിയതിനും പൊതുമുതൽ നശിപ്പിച്ചതിനുമെതിരെ കേസ് എടുക്കണമെന്നാവശ്യപ്പെട്ട് റെയ്ഞ്ച് ഓഫീസർ പരാതി നൽകി.
