എറണാകുളം : വ്ളോഗർ ശ്രീകാന്ത് വെട്ടിയാർക്കെതിരായ ലൈംഗിക പീഡന പരാതിയിൽ ഇരയായ യുവതിയുടെ രഹസ്യമൊഴി രേഖപ്പെടുത്തി. എറണാകുളം ജെ.എഫ്.സി.എം കോടതിയാണ് മൊഴി രേഖപ്പെടുത്തിയത്. രഹസ്യ മൊഴിയും, വൈദ്യപരിശോധന ഫലവും പരിശോധിച്ച ശേഷമായിരിക്കും തുടർ നടപടികൾ സ്വീകരിക്കുകയെന്ന് കൊച്ചി സിറ്റി ഡി.സി.പി വി.യു കുര്യക്കോസ് ഐപിഎസ് അറിയിച്ചു.
സംഭവത്തിൽ കൃത്യമായ അന്വേഷണം നടത്തും. നിലവിൽ ഒരു പരാതി മാത്രമാണ് ലഭിച്ചത്. കൂടുതൽ പരാതികൾ ലഭിച്ചാൽ കൂടുതൽ കേസുകൾ എടുക്കുമെന്നും അദ്ദേഹം പറഞ്ഞു. അതേസമയം ലൈംഗിക പീഡന പരാതിയിൽ കേസെടുത്തതിന് പിന്നാലെ ശ്രീകാന്ത് വെട്ടിയാർ ഒളിവിൽ പോയെന്നാണ് പോലീസ് നൽകുന്ന വിവരം. നിലവിൽ കൊല്ലം സ്വദേശിനിയായ യുവതി നൽകിയ പരാതിയിലാണ് എറണാകുളം സെൻട്രൽ പൊലീസ് കേസെടുത്തത്. വിവാഹ വാഗ്‌ദാനം നൽകി കൊച്ചിയിലെ ഹോട്ടലിലും, ആലുവയിലെ ഫ്ലാറ്റിലും എത്തിച്ച് പീഡിപ്പിച്ചുവെന്നാണ് പരാതി.
READ MORE: വ്‌ളോഗര്‍ ശ്രീകാന്ത് വെട്ടിയാർക്കെതിരായ ലൈംഗിക പീഡന പരാതി ; കേസെടുത്ത് പൊലീസ്
വ്ളോഗർ ശ്രീകാന്ത് വെട്ടിയാർ ലൈംഗികമായി പീഡിപ്പിച്ചുവെന്ന് പരാതിക്കാരി ദിവസങ്ങൾക്ക് മുമ്പ് സമൂഹ മാധ്യമങ്ങളിലൂടെ വെളിപ്പെടുത്തിയിരുന്നു. എന്നാൽ ഇയാള്‍ക്കെതിരെ യുവതി പൊലീസിൽ പരാതി നൽകാത്തത് എന്തുകൊണ്ടെന്ന സംശയം പലരും ഉന്നയിച്ചു. ഇതേതുടർന്നാണ് യുവതി പരാതിയുമായി എറണാകുളം സെൻട്രൽ സ്റ്റേഷനിൽ നേരിട്ടെത്തിയത്.
യുവതിയുടെ പരാതിയിൽ പ്രാഥമിക അന്വേഷണം പൂർത്തിയാക്കിയ ശേഷമായിരിക്കും കസ്റ്റഡിയിലെടുത്ത് ചോദ്യം ചെയ്യുകയും അറസ്റ്റ് ഉൾപ്പടെയുള്ള നടപടികളിലേക്കും കടക്കുക. മറ്റ് പെൺകുട്ടികളും സമാനമായ പരാതിയുമായി പൊലീസിനെ സമീപിക്കുമെന്ന് പരാതിക്കാരി പൊലീസിന് മൊഴി നൽകിയിട്ടുണ്ട്.
