എറണാകുളം : നടിയെ ആക്രമിച്ച കേസിലെ ഒന്നാം പ്രതി പൾസർ സുനിയെ തൃശ്ശൂരിലെ മാനസികാരോഗ്യകേന്ദ്രത്തിൽ പ്രവേശിപ്പിച്ചു. കൊച്ചിയിലെ സബ് ജയിലിൽ നിന്ന് ചൊവ്വാഴ്‌ച രാത്രിയാണ് ചികിത്സയ്ക്കായി സുനിയെ തൃശ്ശൂരിലെത്തിച്ചത്. നടിയെ ആക്രമിച്ച കേസിൽ സുപ്രീം കോടതി സുനിയുടെ ജാമ്യാപേക്ഷ തള്ളിയിരുന്നു.
ഇതിനുപിന്നാലെയാണ് പ്രതി മാനസിക പ്രശ്‌നങ്ങൾ പ്രകടിപ്പിച്ചതെന്നാണ് ജയിൽ അധികൃതർ നൽകുന്ന വിവരം. ഇതേ തുടർന്നാണ് ചികിത്സയ്ക്കായി ആശുപത്രിയിൽ പ്രവേശിപ്പിച്ചത്. കഴിഞ്ഞ അഞ്ചുവർഷമായി പൾസർ സുനി ജയിലിൽ കഴിയുകയാണ്.
വിചാരണ നീണ്ടുപോകുന്ന സാഹചര്യത്തിൽ ജാമ്യം നൽകണമെന്നും, കൂട്ടുപ്രതികൾക്കെല്ലാം ജാമ്യം ലഭിച്ചതായും പൾസർ സുനി സുപ്രീം കോടതിയിൽ വാദിച്ചെങ്കിലും കോടതി അംഗീകരിച്ചിരുന്നില്ല. ഇതിനുശേഷം സുനിയുടെ മാനസിക നില ദുർബലമായെന്നാണ് ജയിൽ അധികൃതർ പറയുന്നത്.
പരിശോധനകളും ആവശ്യമായ ചികിത്സയും നൽകിയ ശേഷമായിരിക്കും തിരിച്ച് എറണാകുളത്ത് എത്തിക്കുക. സുനി മാനസികമായി തകർന്നിരിക്കുകയാണെന്ന് സബ് ജയിലിൽ മകനെ സന്ദർശിച്ച ശേഷം അമ്മ നേരത്തെ മാധ്യമങ്ങളോട് പറഞ്ഞിരുന്നു.
