എറണാകുളം: പന്തീരങ്കാവ് യുഎപിഎ കേസ് കൊച്ചിയിലെ പ്രത്യേക എൻ.ഐ.എ കോടതി ഇന്ന് പരിഗണിക്കും. പ്രതികളെ കസ്റ്റഡിയിൽ വിട്ടു നൽകണമെന്ന ദേശീയ അന്വേഷണ ഏജൻസിയുടെ അപേക്ഷയിലാണ് കോടതി ഇന്ന് വിധി പറയുക. അലനെയും, താഹയെയും കസ്റ്റഡിയിൽ വേണമെന്ന എൻ.ഐ.എയുടെ അപേക്ഷയിൽ ജനുവരി പതിനേഴിന് വാദം പൂർത്തിയാക്കി വിധി പറയാൻ ഇന്നത്തേക്ക് മാറ്റുകയായിരുന്നു. ഏഴ് ദിവസത്തെ കസ്റ്റഡി അനുവദിക്കണമെന്നായിരുന്നു എൻഐഎ ആവശ്യപ്പെട്ടത്.
പ്രതികളുടെ മാവോയിസ്റ്റ് ബന്ധം തെളിയിക്കുന്നതിനുള്ള രേഖകൾ കിട്ടിയിട്ടുണ്ട്. ഇവ പ്രതികളുടെ സാന്നിധ്യത്തിൽ പരിശോധിക്കണം. ഡിജിറ്റൽ രേഖകളുടെ അടിസ്ഥാനത്തിൽ പ്രതികളെ ചോദ്യം ചെയ്യേണ്ടതുണ്ടെന്നും എൻഐഎ കോടതിയെ അറിയിച്ചിരുന്നു. എന്നാൽ പുതിയ തെളിവുകൾ കണ്ടെത്താൻ കഴിഞ്ഞിട്ടില്ലെന്നും അതിനാൽ കസ്റ്റഡി അനുവദിക്കരുതെന്നുമാണ് പ്രതിഭാഗം ആവശ്യപ്പെട്ടത്.
പന്തീരാങ്കാവ് പൊലീസ് യുഎപിഎ നിയമപ്രകാരം രജിസ്റ്റർ ചെയ്ത കേസ്, എൻഐഎ നേരിട്ട് ഏറ്റെടുക്കുകയായിരുന്നു. നിലവിൽ അടുത്ത മാസം പതിനാല് വരെ പ്രതികളെ കോടതി റിമാന്‍റ് ചെയ്തിരിക്കുകയാണ്. അതീവ സുരക്ഷയിൽ പ്രതികളെ താമസിപ്പിക്കണമെന്ന കോടതി നിർദ്ദേശപ്രകാരം പ്രതികൾ തൃശൂർ ജയിലിലാണുള്ളത്.
