എറണാകുളം: കൊച്ചി നഗരസഭയുടെ മൊബൈല്‍ ചികിത്സ സംവിധാനം മാതൃകാപരമെന്ന് ഹൈക്കോടതി ജസ്റ്റിസ് ദേവന്‍ രാമചന്ദ്രന്‍. കൊവിഡ് സാഹചര്യത്തില്‍ അഭിമുഖീകരിക്കുന്ന ഏറ്റവും വലിയ പ്രതിസന്ധി ആശുപത്രികളില്‍ കിടക്കകള്‍ ലഭ്യമല്ലെന്നതാണ്. ഈ സാഹചര്യത്തെ മറികടക്കാനുള്ള ഒരു നല്ല ആശയമാണ് കൊവിഡ് മൊബൈല്‍ മെഡിക്കല്‍ യൂണിറ്റെന്നും അദ്ദേഹം പറഞ്ഞു.
read more: കൊവിഡ് വ്യാപനം : എറണാകുളത്ത് സ്ഥിതി അതീവഗുരുതരം
ഇത്തരം മൊബൈല്‍ ചികിത്സ യൂണിറ്റുകള്‍ ജനങ്ങളിലേക്ക് നേരിട്ട് എത്തുന്നതോടെ 90 ശതമാനം ആളുകള്‍ക്കും ആശുപത്രിയിലേക്ക് പോകേണ്ടിവരില്ല. കൊവിഡിനെ കുറിച്ചുള്ള ഭീതിയാണ് ജനങ്ങളെ ഭയപ്പെടുത്തുന്നത്. എന്ത്‌ ചെയ്യണമെന്ന് അറിയാതെ ജനങ്ങള്‍ നെട്ടോട്ടമോടുകയാണെന്നും ജസ്റ്റിസ് പറഞ്ഞു. കൊച്ചി നഗരസഭയുടെ 24 മണിക്കൂറും പ്രവര്‍ത്തിക്കുന്ന കൊവിഡ് കണ്‍ട്രോള്‍ റൂമിന്‍റെയും മൊബൈല്‍ മെഡിക്കല്‍ യൂണിറ്റിന്‍റെ ഉദ്‌ഘാടനവും ഫ്ലാഗ്‌ ഓഫ്‌ കര്‍മ്മവും അദ്ദേഹം നിര്‍വഹിച്ചു. കൊച്ചി മേയർ എം.അനിൽകുമാർ ഉൾപ്പടെയുള്ളവര്‍ ചടങ്ങിൽ പങ്കെടുത്തു.
