കൊച്ചി: ബധിര വിദ്യാർഥികൾക്കായി 2022-23 അധ്യയന വർഷം മുതൽ എയ്ഡഡ് ആർട്‌സ് ആൻഡ് സയൻസ് കോളജ് തുടങ്ങാൻ അനുവദിക്കണമെന്ന ചാരിറ്റബിൾ സൊസൈറ്റിയുടെ ഹർജിയിൽ കേരള ഹൈക്കോടതി സംസ്ഥാന സർക്കാരിന്‍റെ പ്രതികരണം തേടി. ഹർജി ഫയലിൽ സ്വീകരിച്ച കോടതി സംസ്ഥാന സര്‍ക്കാറിന് നോട്ടീസ് അയച്ചു. ബധിര വിദ്യാർഥികൾക്കായുള്ള എയ്ഡഡ് കോളജിന് മഹാത്മാഗാന്ധി സർവകലാശാലയുടെ അഫിലിയേഷൻ വേണമെന്നും ഹര്‍ജിക്കാരായ സേക്രഡ് ഹാർട്ട് ക്ലാരിസ്റ്റ് പ്രൊവിൻസ് ചാരിറ്റബിൾ സൊസൈറ്റി ആവശ്യപ്പെട്ടു.
230 വിദ്യാർഥികൾ പഠിക്കുന്ന മാണിക്കമംഗലത്ത് ബധിര വിദ്യാലയം സ്ഥാപിക്കാന്‍ അനുമതി നല്‍കണമെന്നും വാദത്തിലുണ്ട്. 5.71 ഏക്കർ സ്ഥലവും 100 കുട്ടികള്‍ക്ക് താമസിച്ച് പഠിക്കാനുള്ള പാർപ്പിടമുൾപ്പെടെയുള്ള കെട്ടിടവും മറ്റ് അടിസ്ഥാന സൗകര്യങ്ങളും തങ്ങള്‍ക്കുണ്ട്. കഴിഞ്ഞ വർഷം ഓഗസ്റ്റിൽ കോളജിനുള്ള അനുമതിക്കും എൻഒസിക്കും അപേക്ഷ നൽകിയിരുന്നു. എന്നാല്‍ ഇതുവരെ ലഭിച്ചില്ല. അതിനാല്‍ തന്നെ കോടതി ഇടപെട്ട് എയ്ഡഡ് ആർട്‌സ് ആൻഡ് സയൻസ് കോളജ് തുടങ്ങാൻ അനുമതി നല്‍കണമെന്നാണ് വാദം.
Also Read: അവധി ദിനത്തില്‍ രാത്രി പ്രത്യേക സിറ്റിങ്: ലക്ഷദ്വീപിലെ പൊളിക്കല്‍ നടപടിക്ക് ഹൈക്കോടതിയുടെ സ്റ്റേ
പുതിയ എയ്ഡഡ് കോളജുകള്‍ തുറക്കേണ്ടെന്നാണ് സര്‍ക്കാര്‍ നിലപാടെന്ന് സൊസൈറ്റിയെ പ്രതിനിധീകരിച്ച മുതിർന്ന അഭിഭാഷകൻ ജാജു ബാബു കോടതിയെ അറിയിച്ചു. കോട്ടയം, തൃശൂർ, എറണാകുളം ജില്ലകളിലായി 125 ബധിരവിദ്യാർഥികൾ വിജയകരമായി ഹയർസെക്കൻഡറി കോഴ്‌സുകൾ ഈ വര്‍ഷം പൂർത്തിയാക്കിയുണ്ട്. എന്നാല്‍ പ്രത്യേക ഡിഗ്രിക്ക് പ്രത്യേക കോളജ് ഇല്ലാത്തത് ഇവര്‍ക്ക് തുടര്‍ പഠനം സാധ്യമാകുന്നില്ല.
ഓരോ വർഷവും ഹയർസെക്കൻഡറി കോഴ്‌സ് പാസാകുന്ന ഇവരിൽ പകുതി പേർക്കും കോളജ് വിദ്യഭ്യാസത്തിനുള്ള അവസരം നിഷേധിക്കപ്പെടുന്നു. കേരള സർവകലാശാലയുടെയും കാലിക്കറ്റ് സര്‍വകലാശാലയുടെയും അഫിലിയേറ്റ് ചെയ്ത മൂന്ന് പ്രത്യേക കോളജുകളല്ലാതെ ബധിരർക്കായി ഒരു എയ്ഡഡ് കോളജും സംസ്ഥാനത്ത് ഇല്ലെന്നത് ദൗർഭാഗ്യകരമാണും ഹർജിക്കാർ കോടതിയെ അറിയിച്ചു.
