എറണാകുളം: വാളയാർ പെൺകുട്ടികൾക്ക് നീതി ഉറപ്പാക്കണമെന്ന് ആവശ്യപ്പെട്ട് കൊച്ചിയിൽ നിന്നും തിരുവനന്തപുരത്തേക്ക് ലോങ് മാർച്ച് സംഘടിപ്പിക്കാനൊരുങ്ങി ജസ്റ്റിസ് ഫോർ വാളായർ കിഡ്സ്. സംസ്ഥാനത്തെ ദളിത് ആദിവാസി സംഘടനകളും സ്ത്രീ സംഘടനകളും പരിസ്ഥിതി പ്രവർത്തകരും ആക്ടിവിസ്റ്റുകളുമാണ് ജസ്റ്റിസ് ഫോര്‍ വാളയാര്‍ കിഡ്സ് എന്ന കൂട്ടായ്‌മയിലുള്ളത്.
വാളയാര്‍ പെണ്‍കുട്ടികള്‍ക്ക് നീതി തേടിയാണ് മാര്‍ച്ച് നടത്തുക കൊച്ചിയിൽ നടന്ന രാപ്പകൽ സമരം വാളയാർ വിഷയത്തിന് പുതിയൊരു സമരമുഖം നല്‍കിയെന്ന് കൂട്ടായ്മക്ക് നേതൃത്വം നൽകുന്ന സി .ആർ നീലകണ്ഠൻ ഇ.ടി.വി. ഭാരതിനോട് പറഞ്ഞു. വാളയാർ പെൺകുട്ടികളുടെ കാര്യത്തിൽ സർക്കാരിനും പൊലീസിനും വീഴ്ച പറ്റി.അന്വേഷണത്തിൽ വീഴ്ച വരുത്തിയ പൊലീസ് ഉദ്യോഗസ്ഥര്‍ക്കെതിരെ ക്രിമിനൽ നടപടി സ്വീകരിക്കണം. അതിനു ശേഷം മാത്രമേ സി.ബി.ഐ അന്വേഷണമെന്ന ആവശ്യത്തിന് പ്രസക്തിയുള്ളൂവെന്നും അദ്ദേഹം പറഞ്ഞു. ഡിസംബര്‍ മൂന്നിന് ഹൈക്കോടതിക്ക് സമീപത്ത് നിന്നും സെക്രട്ടേറിയറ്റിലേക്ക് കാൽ നടയായി ലോങ്ങ് മാർച്ച് നടത്തും. ഇരുപത് ദിവസം നീണ്ടു നിൽക്കുന്നതായിരിക്കും പ്രതിഷേധം.
