എറണാകുളം: പി വി അൻവർ എംഎൽഎയുടെ ഉടമസ്ഥതയിലുള്ള പി.വി.ആർ നേച്ചർ റിസോർട്ടിലെ നാല് തടയണകളും പൊളിച്ച് നീക്കാന്‍ ഹൈക്കോടതിയുടെ നിര്‍ദേശം. റിസോർട്ടിലുള്ള നാല് തടയണകൾ നീരൊഴുക്ക് തടസപ്പെടുത്തുവെന്ന പരാതിയെ തുടര്‍ന്നാണ് നടപടി. ഒരു മാസത്തിനുള്ളിൽ നാല് തടയണകളും പൊളിക്കണമെന്നും ചീഫ് ജസ്റ്റിസ് അധ്യക്ഷനായ ഡിവിഷൻ ബഞ്ച് നിർദേശം നൽകി.
ഉടമകൾ പൊളിച്ചില്ലെങ്കിൽ കൂടരഞ്ഞി പഞ്ചായത്ത് സെക്രട്ടറി തടയണകൾ പൊളിച്ചതിനു ശേഷം ഇതിനു ചെലവായ തുക റിസോർട്ട് ഉടമകളിൽ നിന്നും ഈടാക്കാനാണ് ഉത്തരവ്. തടയണകൾ പൊളിക്കണമെന്ന ജില്ല കലക്‌ടറുടെ ഉത്തരവിനെതിരെയാണ് ഉടമകൾ ഹൈക്കോടതിയെ സമീപിച്ചത്. തടയണകൾ പൊളിച്ചുനീക്കാത്തതിന്‍റെ പേരിൽ ജില്ല കലക്‌ടര്‍ക്കെതിരെ കോടതിയലക്ഷ്യ നടപടിക്ക് ഹൈക്കോടതി നേരത്തെ നിർദേശിച്ചിരുന്നു. തടയണ പൊളിക്കാൻ കലക്‌ടർ ഉത്തരവിട്ടതോടെ പി.വി അൻവർ, റിസോർട്ട് കരാറുകാരന് കൈമാറിയിരുന്നു.
