എറണാകുളം: കണ്ണൂർ സർവകലാശാല ബോർഡ് ഓഫ് സ്റ്റഡിസ് നിയമനം റദ്ദാക്കി ഹൈക്കോടതി. ചാൻസലറായ ഗവർണർ അറിയാതെ നടത്തിയ നിയമനം ചട്ടവിരുദ്ധമെന്ന് ചൂണ്ടികാണിച്ചാണ് ഡിവിഷൻ ബെഞ്ച് നിയമനം റദ്ദാക്കിയത്. നിയമനം ശരിവച്ച സിംഗിൾ ബെഞ്ച് ഉത്തരവ് അസാധുവാക്കിയാണ് ഡിവിഷൻ ബെഞ്ചിന്‍റെ ഉത്തരവ്.
യൂണിവേഴ്‌സിറ്റി ചാൻസലർ കൂടിയായ ഗവർണറുടെ അനുമതി ഇല്ലാതെ വിവിധ പഠന ബോർഡ് അംഗങ്ങളുടെ നിയമനം നടത്തിയത് ചോദ്യം ചെയ്തായിരുന്നു ഹർജി. സെനറ്റ് അംഗം വി. വിജയകുമാർ, അക്കാദമിക് കൗൺസിൽ അംഗം ഡോ. ഷിനോ. പി. ജോസ് എന്നിവരാണ് വിഷയത്തിൽ ഡിവിഷൻ ബെഞ്ചിനെ സമീപിച്ചത്. ചീഫ് ജസ്റ്റിസ് എസ്. മണികുമാർ, ജസ്റ്റിസ് ഷാജി പി. ചാലി എന്നിവരടങ്ങുന്ന ഡിവിഷൻ ബെഞ്ചാണ് ഹർജി പരിഗണിച്ചത്.
ചാൻസലർ അറിയാതെ സർവകലാശാല പഠന ബോർഡുകൾ പുനസംഘടിപ്പിച്ച സർവകലാശാലയുടെ നടപടി
ചട്ടവിരുദ്ധമാണെന്ന് ഗവർണറുടെ അഭിഭാഷകൻ കോടതിയെ അറിയിച്ചിരുന്നു. ഇത് ഹൈക്കോടതി അംഗീകരിക്കുകയായിരുന്നു. വിവിധ വിഷയങ്ങൾക്കുള്ള 72 ബോർഡുകളാണ് പുനഃസംഘടിപ്പിച്ചത്. രണ്ട് വർഷമാണ് ബോർഡുകളുടെ കാലാവധി.
സർക്കാർ, എയിഡഡ് കോളജുകളിലെ മുതിർന്ന പല അധ്യാപകരെയും ഒഴിവാക്കി, യുജിസി യോഗ്യതകളില്ലാത്ത സ്വശ്രയ കോളജ് അധ്യാപകരേയും കരാർ അധ്യാപകരേയും ബോർഡിൽ ഉൾപ്പെടുത്തിയതായി ഹർജിയിൽ ചൂണ്ടികാണിച്ചിരുന്നു. വിവിധ കോഴ്‌സുകളുടെ സിലബസുകളും പാഠപുസ്‌തകങ്ങളും തയാറാക്കുക, ചോദ്യ പേപ്പർ തയാറാക്കേണ്ടവരുടെ പാനൽ അംഗീകരിക്കുക തുടങ്ങിയ ഉത്തരവാദിത്തങ്ങളാണ് ബോർഡിനുള്ളത്.
സർവകലാശാല നിയമമനുസരിച്ച് ബോർഡിന്‍റെ ചെയർമാനെയും അംഗങ്ങളെയും നാമനിർദേശം ചെയ്യുവാനുള്ള അധികാരം ഗവർണർക്കാണ്. കണ്ണൂർ സർവകലാശാല നിലവിൽ വന്ന 1996 മുതൽ ഗവർണറാണ് ബോർഡിലെ അംഗങ്ങളെ നാമനിർദേശം ചെയ്തിരുന്നത്. എന്നാൽ വി.സി നിയോഗിച്ച സിൻഡിക്കേറ്റിന്‍റെ മൂന്ന് അംഗ സമിതിയായിരുന്നു ഗവർണർക്ക് പകരം ഇത്തവണ ബോർഡ് അംഗങ്ങളുടെ പേരുകൾ നിർദേശിച്ചത്. ഇത് ചോദ്യം ചെയ്ത് സമർപ്പിച്ച ഹർജിയിലാണ് ഹൈക്കോടതി അനുകൂല ഉത്തരവ് നൽകിയത്.
ALSO READ:കെ റെയില്‍: പ്രതിഷേധം ശക്തം, കോഴിക്കോട്‌ ഇന്ന് സര്‍വെ മാത്രം
