എറണാകുളം: പോക്‌സോ കേസിൽ അറസ്റ്റിലായ നടൻ ശ്രീജിത്ത് രവിക്ക് ഹൈക്കോടതി ഉപാധികളോടെ ജാമ്യം അനുവദിച്ചു. മാനസിക വൈകല്യമുള്ളതിനാലാണ് കുട്ടികൾക്ക് മുന്നിൽ നഗ്നത പ്രദർശനം നടത്തിയതെന്ന ശ്രീജിത്ത് രവിയുടെ വാദം അംഗീകരിച്ചാണ് കോടതിയുടെ നടപടി. തൃശൂർ എസ്‌എൻ പാർക്കിന് സമീപത്ത് വച്ച് രണ്ട് പെൺകുട്ടികൾക്ക് മുന്നിൽ നഗ്നത പ്രദർശനം നടത്തിയെന്ന പരാതിയെ തുടര്‍ന്നാണ് താരത്തെ അറസ്‌റ്റ് ചെയ്‌തത്.
സംഭവ ദിവസം മരുന്ന് കഴിച്ചിരുന്നില്ല. ചികിത്സ ലഭിച്ചിരുന്ന സാഹചര്യത്തിൽ ഇത്തരം സംഭവങ്ങൾ ഉണ്ടായിട്ടില്ലെന്നും ജാമ്യം അനുവദിക്കണമെന്നും ശ്രീജിത്ത് രവിയുടെ അഭിഭാഷകൻ കോടതിയിൽ വ്യക്തമാക്കി. ഈ വാദം അംഗീകരിച്ച സിംഗിൾ ബെഞ്ച് ഉപാധികളോടെ നടന് ജാമ്യം അനുവദിക്കുകയായിരുന്നു.
