എറണാകുളം: എൻഫോഴ്‌മെന്‍റ് ഡയറക്‌ടറേറ്റിനെതിരായ ക്രൈം ബ്രാഞ്ച് അന്വേഷണം റദ്ദാക്കിയതിനെതിരെ സർക്കാർ ഹൈക്കോടതിയെ സമീപിച്ചു. ഇഡി ഉദ്യോഗസ്ഥർക്കെതിരെയാണ് ആരോപണം നിലനിൽക്കുന്നത്. ഇഡിക്കെതിരായ ആരോപണത്തിൽ പൊലീസ് പരിശോധന ആവശ്യമാണെന്നാണ് സർക്കാർ ആവശ്യപ്പെടുന്നത്. എഫ്.ഐ.ആർ റദ്ദാക്കിയ സിംഗിൾ ബെഞ്ച് ഉത്തരവ് നിയമ വിരുദ്ധമാണെന്നും സർക്കാർ അപ്പീൽ ഹർജിയിൽ ചൂണ്ടികാണിച്ചു.
സ്വർണക്കടത്ത് കേസിൽ മുഖ്യമന്ത്രിയുടെയും മന്ത്രിമാരുടെയും പേര് പറയാൻ ഇ.ഡി ഉദ്യോഗസ്ഥർ പ്രതികളായ സ്വപ്‌ന സുരേഷ്, സന്ദീപ് നായർ എന്നിവരെ നിർബന്ധിച്ചുവെന്ന് ആരോപിച്ച് ക്രൈംബ്രാഞ്ച് രജിസ്റ്റർ ചെയ്‌ത രണ്ട് എഫ്.ഐ.ആറുകളും അന്വേഷണവും ഹൈക്കോടതി സിംഗിൾ ബെഞ്ച് നേരത്തെ റദ്ദാക്കിയിരുന്നു. ഇതിനെതിരെയാണ് സർക്കാർ ഡിവിഷൻ ബെഞ്ചിനെ സമീപിച്ചത്.
ഇ.ഡി കോടതിയിൽ
കേന്ദ്ര അന്വേഷണ ഏജൻസികൾക്കെതിരായ പരാതിയിൽ അന്വേഷണം നടത്തേണ്ടത് സംസ്ഥാന ഏജൻസിയല്ലെന്നും, കോടതിയാണന്നുമുള്ള ഇ.ഡിയുടെ വാദം കോടതി അംഗീകരിക്കുകയായിരുന്നു. ഈ കേസിൽ ക്രൈംബ്രാഞ്ച് കണ്ടെത്തിയ വിവരങ്ങൾ എറണാകുളം പ്രിൻസിപ്പൽ സെഷൻസ് കോടതിക്ക് കൈമാറാനും ഹൈക്കോടതി നിർദേശിച്ചിരുന്നു.
ഇത് അനുസരിച്ച് ക്രൈംബ്രാഞ്ച് കൈമാറിയ രേഖകൾ അടിസ്ഥാനമാക്കി പ്രിൻസിപ്പൽ സെഷൻസ് കോടതി ഇ.ഡിക്കെതിരെ കേസെടുത്തിരുന്നു. എന്നാൽ തങ്ങളുടെ ഭാഗം ബോധിപ്പിക്കാൻ അവസരം നൽകാൻ അനുമതി നൽകണമെന്ന ഇ.ഡിയുടെ അപേക്ഷ പരിഗണിച്ച് കോടതി സമയം അനുവദിച്ചിരുന്നു. ഇതിനിടെയാണ് ഇ.ഡിക്കെതിരായ ക്രൈംബ്രാഞ്ച് അന്വേഷണം റദ്ദാക്കിയതിനെതിരെ സർക്കാർ ഹൈക്കോടതി സമീപിച്ചത്.
READ MORE: ഇഡിക്കെതിരായ ക്രൈംബ്രാഞ്ച് കേസ് ഹൈക്കോടതി റദ്ദാക്കി
