പിരിച്ചുവിട്ട കെഎസ്ആർടിസി എംപാനൽ ജീവനക്കാരെ തിരികെ ജോലിയിൽ പ്രവേശിപ്പിക്കാൻസർക്കാർ തീരുമാനം. സമരം നടത്തിവന്ന എംപാനൽ കൂട്ടായ്മയുമായി ഗതാഗത മന്ത്രി എ കെ ശശീന്ദ്രൻ നടത്തിയ ചർച്ചയെ തുടർന്നാണ് തീരുമാനം. ഇതോടെ 47 ദിവസമായി സെക്രട്ടറിയേറ്റിന് മുന്നിൽ നടത്തിവന്ന സമരം ജീവനക്കാർ അവസാനിപ്പിച്ചു.
ഇന്ന് ഉച്ചയോടെയാണ് ചർച്ചക്ക്ക്ഷണിച്ചു കൊണ്ട് ഗതാഗത മന്ത്രിയുടെ ഓഫീസിൽ നിന്ന് സമരം നടത്തുന്ന എംപാനൽ കൂട്ടായ്മക്ക് അറിയിപ്പ് ലഭിക്കുന്നത്. തുടർന്ന് വൈകീട്ട് അഞ്ചുമണിയോടെ കൂട്ടായ്മ പ്രതിനിധികൾ ഗതാഗത മന്ത്രി എ കെ ശശീന്ദ്രന്‍റെ ചേംബറിൽ എത്തി ചർച്ച നടത്തി. കോടതിയലക്ഷ്യം ക്ഷണിച്ചു വരുത്താതെ എംപാനലുകാരെ തിരികെ എടുക്കാം എന്ന സമീപനം തുടക്കം മുതലേ ഗതാഗതമന്ത്രി സ്വീകരിച്ചിരുന്നു. കെഎസ്ആർടിസിയിലെ സ്ഥിരം ജീവനക്കാരുടെ ലീവ് ഒഴിവിൽ പിരിച്ചുവിട്ട ജീവനക്കാരെ തിരിച്ചെടുക്കാമെന്ന് മന്ത്രി ഉറപ്പുനൽകി.
ഏറ്റവും കുറഞ്ഞത് അഞ്ചു വർഷം പൊതുമേഖലാസ്ഥാപനങ്ങളിൽ കണ്ടക്ടറായിട്ടുളള മുഴുവൻ അംഗങ്ങളെയും ഈ വ്യവസ്ഥയിൽ ഉൾപ്പെടുത്താൻ ധാരണയായി. ഇതോടെ സമരം അവസാനിപ്പിക്കുന്നതായി എംപാനൽ കൂട്ടായ്മ അറിയിച്ചു.
ലോക്സഭാ തെരഞ്ഞെടുപ്പ് പ്രഖ്യാപനത്തിന് മുമ്പ് സമരം ഒത്തുതീർപ്പ് ആകുന്നില്ലെങ്കിൽ ഒരുപക്ഷേ നീണ്ടുപോകുമെന്ന ആശങ്ക തൊഴിലാളികൾക്കുണ്ടായിരുന്നു. സർക്കാരിൽ കൂടുതൽ സമ്മർദ്ദം ചെലുത്തുന്നതിന്‍റെ ഭാഗമായി പിരിച്ചുവിട്ട വനിതാ കണ്ടക്ടർമാർ സെക്രട്ടറിയറ്റിനു മുന്നിൽ അനിശ്ചിതകാല നിരാഹാരസമരവും ആരംഭിച്ചിരുന്നു.
