ടൂറിസ്റ്റ് ഗൈഡ് മരിച്ച നിലയില്‍; മൃതദേഹം കണ്ടെത്തിയത് കനാലില്‍

ആലപ്പുഴ വലിയമരത്ത് ഇർഷാദ് പള്ളിക്ക് സമീപം താമസിക്കുന്ന ഷിബുവിനെയാണ് വാടക്കനാലില്‍ മരിച്ച നിലയില്‍ കണ്ടെത്തിയത്.

ആലപ്പുഴ: കോടതി പാലത്തിന് സമീപത്തെ വാടക്കനാലിൽ ടൂറിസ്റ്റ്‌ ഗൈഡിനെ മരിച്ച നിലയില്‍ കണ്ടെത്തി. ആലപ്പുഴ വലിയമരം വാർഡിൽ ഇർഷാദ് പള്ളിക്ക് സമീപം താമസിക്കുന്ന ഷിബു(50)വിന്‍റെ മൃതദേഹമാണ് കനാലിൽ കണ്ടെത്തിയത്.

ആലപ്പുഴ നോർത്ത് പൊലീസിന്‍റെ നേതൃത്വത്തില്‍ ഇന്‍ക്വസ്റ്റ് നടപടികൾ പൂർത്തിയാക്കി മൃതദേഹം വണ്ടാനം മെഡിക്കൽ കോളജ് ആശുപത്രിയിലേക്ക് മാറ്റി. ഭാര്യയുമായി അകന്നു താമസിക്കുന്ന ഇയാൾ നഗരത്തിൽ ടൂറിസ്റ്റ് ഗൈഡായി പ്രവർത്തിക്കുകയായിരുന്നുവെന്ന് പൊലീസ് പറഞ്ഞു. സംഭവത്തിൽ കേസെടുത്ത് അന്വേഷണം ആരംഭിച്ചു.