Prohibited Tobacco Products Siezed: കൊല്ലത്ത്‌ പൊലീസിന്‍റെ വാഹന പരിശോധന; പിടിച്ചെടുത്തത്‌ ഒന്നര കോടിയുടെ നിരോധിത പുകയില ഉൽപ്പന്നങ്ങൾ

Prohibited Tobacco Products Siezed: ഒന്നര കോടിയോളം രൂപ വിലവരുന്ന രണ്ടേ കാൽ ലക്ഷത്തോളം പായ്ക്കറ്റ് നിരോധിത പുകയില ഉൽപ്പന്നങ്ങൾ പിടികൂടി

കൊല്ലം: Prohibited Tobacco Products Siezed: ആലപ്പുഴ കൊലപാതകങ്ങളുടെ പശ്ചാത്തലത്തിൽ ബൈപാസ് റോഡിൽ കിളികൊല്ലൂർ പൊലീസ് നടത്തിയ വാഹന പരിശോധനയിൽ ഒന്നര കോടിയോളം രൂപ വിലവരുന്ന രണ്ടേകാൽ ലക്ഷത്തോളം പായ്ക്കറ്റ് നിരോധിത പുകയില ഉൽപ്പന്നങ്ങൾ പിടികൂടി. രണ്ട് ലോറികളിലായി കൊണ്ടുവരികയായിരുന്ന 90 ചാക്ക് നിരോധിത പുകയില ഉൽപ്പന്നങ്ങളാണ് പിടിയിലായത്. സംസ്ഥാനത്ത് നിരോധിത പുകയില ഉൽപ്പന്നങ്ങളുടെ മൊത്തവ്യാപാരം നടത്തുന്ന സംഘത്തിന്‍റെ പുകയില ഉൽപ്പന്നങ്ങളാണ് പിടിയിലായിട്ടുള്ളത്.

ഒരു ലോറി പൊലീസ് പിടികൂടുന്നതു കണ്ട് പിന്നാലെ വരികയായിരുന്ന ലോറി ഉപേക്ഷിച്ച് ഡ്രൈവർ രക്ഷപെട്ടു. ഒരു ലോറിയുടെ ഡ്രൈവർ അറസ്‌റ്റിലായി. ചാലക്കുടിയിൽ നിന്നും തിരുവനന്തപുരം ഭാഗത്തേക്ക് കൊണ്ടു പോകുകയായിരുന്ന പുകയില ഉൽപ്പന്നങ്ങളാണ് പിടിയിലായത്.

ഡി.ജി.പി.യുടെ കാവൽ, റേഞ്ച് ഡി.ഐ.ജിയുടെ ഓപ്പറേഷൻ ട്രോജൻ എന്നീ പദ്ധതികളുടെ ഭാഗമായി സിറ്റി പൊലീസ് കമ്മിഷണർ ടി.നാരായണന്‍റെ നിർദ്ദേശ പ്രകാരം ബൈപാസ് റോഡിൽ കല്ലുംതാഴം ഭാഗത്ത് നടത്തിയ വാഹന പരിശോധനയിലാണ് ഒന്നര കോടിയോളം രൂപ വില വരുന്ന പുകയില ഉൽപ്പന്നങ്ങൾ പിടികൂടിയത്.

തൃശൂർ വേലൂപ്പാടം വരന്തരപ്പള്ളി കണ്ണൂർ കാടൻ പ്രമോദ് (37) ആണ് സംഭവവുമായി ബന്ധപ്പെട്ട് അറസ്‌റ്റിലായത്. ലോറി ഉപേക്ഷിച്ചു രക്ഷപെട്ട ഡ്രൈവറെക്കുറിച്ച് പൊലീസിന് വിവരം ലഭിച്ചിട്ടുണ്ട്.

പാൻ മസാല കൊടുത്തു വിട്ട മൊത്തവ്യാപാരിയുടെ വിവരങ്ങളും പൊലീസ് ശേഖരിച്ചിട്ടുണ്ട്. തിരുവനന്തപുരം ജില്ലയുടെ വിവിധ ഭാഗങ്ങളിൽ സ്‌കൂൾ പരിസരങ്ങളിലും, അന്യസംസ്ഥാന തൊഴിലാളി ക്യാമ്പുകളിലും വിതരണം ചെയ്യുന്നതിനായി കൊണ്ടുവന്ന പാൻ മസാലയാണ് പൊലീസ് പിടികൂടിയത്.

ലഹരിക്കടത്തിന്‍റെ രീതി ഇങ്ങനെ

'ചാലക്കുടിയിൽ ഹൈവേയിൽ പാൻ മസാല നിറച്ച ലോറി നിർത്തിയിട്ടിരിക്കും. ലോറിയിൽ താക്കോലും ഉണ്ടാകും. ലോറിക്കടുത്ത് ആരും ഉണ്ടാകില്ല. ഡ്രൈവർമാർ അവിടെയെത്തി ലോറി എടുത്തു കൊണ്ടു പോയാൽ മാത്രം മതിയാകും.

എവിടെ എത്തിയ്ക്കണമെന്ന് ഡ്രൈവറുടെ മൊബൈൽ ഫോണിലെ ഗൂഗിൾ ലൊക്കേഷൻ മാപ്പ് വഴി നിർദ്ദേശം നൽകും. പണവും ഗൂഗിൾ വഴി ട്രാൻസ്‌ഫർ ചെയ്‌തു നൽകുകയാണ് പതിവ്‌' എന്ന്‌ പിടിയിലായ ഡ്രൈവർ പൊലീസിനോട് പറഞ്ഞു.

കഴിഞ്ഞ ദിവസം ബാലരാമപുരത്ത് പാൻമസാല ഇറക്കിയ സ്ഥലവും ഇയാൾ പൊലീസിന് പറഞ്ഞു കൊടുത്തിട്ടുണ്ട്. പച്ചക്കറി കയറ്റി വരുന്ന ബോർഡ്‌ വച്ച ലോറിയിലാണ് നിരോധിത പുകയില ഉൽപ്പന്നങ്ങൾ ഇവർ കടത്തിയിരുന്നത്.