ആലപ്പുഴ: ഇടത് സ്ഥാനാര്‍ഥി പ്രഖ്യാപനവുമായി ബന്ധപ്പെട്ട് ഉയരുന്ന പ്രാദേശിക പ്രതിഷേധങ്ങള്‍ ഇടതുമുന്നണിയുടെ വിജയസാധ്യതയെ ബാധിക്കില്ലെന്ന് സിപിഎം പോളിറ്റ് ബ്യൂറോ അംഗം എസ്.രാമചന്ദ്രൻ പിള്ള. പ്രാദേശികമായ എതിർപ്പുകളും വിയോജിപ്പുകളും ചിലയാളുകൾ പ്രകടിപ്പിച്ചിട്ടുണ്ടാവും. എന്നാല്‍ അത് കേരളത്തിലെ എല്‍ഡിഎഫിന്‍റെ വിജയസാധ്യതയെ ബാധിക്കില്ലെന്നും ഈ തെരഞ്ഞെടുപ്പില്‍ ചരിത്രം തിരുത്തി ഇടതുമുന്നണി ഭരണത്തുടര്‍ച്ച നേടുമെന്നും എസ്ആര്പി പറഞ്ഞു.
കേരളത്തില്‍ എല്‍ഡിഎഫിന് ഭരണ തുടര്‍ച്ചയുണ്ടാകും; പ്രാദേശിക പ്രതിഷേധങ്ങള്‍ ബാധിക്കില്ലെന്ന് എസ്ആര്പി
വിജയസാധ്യത നോക്കിയാണ് പാര്‍ട്ടി സ്ഥാനാര്‍ഥികളെ നിശ്ചയിച്ചിട്ടുള്ളത്. ഇന്ത്യയിലെ പൊതുവായ രാഷ്ട്രീയ സാഹചര്യത്തിൽ കേരളത്തിലെ ഇടതുമുന്നണിയുടെ വിജയം രാജ്യത്തെ ഇടതുപക്ഷ സംഘടനകളുടെ വളർച്ചയെയും മുന്നേറ്റത്തെയും സ്വാധീനിക്കുമെന്നും മറ്റ് സംസ്ഥാനങ്ങളിലെ തെരഞ്ഞെടുപ്പ് വിജയങ്ങളിലും അവ പ്രതിഫലിക്കുമെന്നും രാമചന്ദ്രൻ പിള്ള പറഞ്ഞു.
